ദോഹ: ഹമദ് മെഡിക്കൽ കോർപ്പറേഷന് (എച്ച്.എം.സി) കീഴിലുള്ള ഹമദ് ജനറൽ ആശുപത്രിയിലെ ഓർത്തോപീഡിക് സർജറി വിഭാഗം ആധുനിക എൻഡോസ്കോപ്പിക് സ്പൈൻ സർജറി ചികിത്സകൾ വ്യാപിപ്പിച്ചു. ഡിസ്ക് പ്രൊലാപ്സ് (Herniated Discs), നട്ടെല്ലിലെ ഞരമ്പുകൾ ഞെരുങ്ങുന്ന അവസ്ഥ (Spinal Canal Stenosis) എന്നിവ ബാധിച്ച രോഗികൾക്കാണ് ഏറ്റവും പുതിയ അന്താരാഷ്ട്ര നിലവാരത്തിലുള്ള ഈ ചികിത്സ ലഭ്യമാക്കുന്നത്.
​പരമ്പരാഗത ഓപ്പൺ സർജറികൾക്ക് പകരം ഒരു സെന്റീമീറ്ററിൽ താഴെ മാത്രം വലിപ്പമുള്ള ചെറിയ മുറിവിലൂടെ ശസ്ത്രക്രിയ പൂർത്തിയാക്കാൻ കഴിയുമെന്നതാണ് ഈ സാങ്കേതികവിദ്യയുടെ പ്രധാന സവിശേഷത. രോഗികൾക്ക് വേദന കുറയ്ക്കാനും വേഗത്തിൽ സുഖം പ്രാപിക്കാനും ഇത് സഹായിക്കുമെന്ന് ഓർത്തോപീഡിക് സർജറി വിഭാഗം മേധാവി ഡോ. ഫൈസൽ അൽ ഷമ്മാരി പറഞ്ഞു.
​ഹൈ-ഡെഫിനിഷൻ ക്യാമറയും നേർത്ത ട്യൂബും ശരീരത്തിനുള്ളിലേക്ക് കടത്തിവിട്ട് മോണിറ്ററിൽ തത്സമയം ദൃശ്യങ്ങൾ കണ്ടാണ് സർജന്മാർ ശസ്ത്രക്രിയ നടത്തുന്നത്. രക്തസ്രാവം തടയാനും നട്ടെല്ലിന് ചുറ്റുമുള്ള പേശികൾക്ക് കേടുപാടുകൾ സംഭവിക്കാതെ സംരക്ഷിക്കാനും ആധുനിക സംവിധാനങ്ങൾ സഹായിക്കുമെന്ന് കൺസൾട്ടന്റ് ഓർത്തോപീഡിക് ആൻഡ് സ്പൈൻ സർജർ ഡോ. ബസിം ഷമാൻ അമീൻ വ്യക്തമാക്കി.
​ശസ്ത്രക്രിയയ്ക്ക് ശേഷം വേദനയും രക്തനഷ്ടവും വളരെ കുറവായിരിക്കുമെന്നതും ഇതിന്റെ പ്രത്യേകതയാണ്. ആരോഗ്യനില തൃപ്തികരമായ രോഗികൾക്ക് ശസ്ത്രക്രിയ കഴിഞ്ഞ് ഏതാനും മണിക്കൂറുകൾക്കകം നടക്കാനും, അന്നുതന്നെ ആശുപത്രി വിടാനും സാധിക്കും. രോഗിയുടെ ആരോഗ്യസ്ഥിതിയും മെഡിക്കൽ പരിശോധനാ ഫലങ്ങളും വിലയിരുത്തി മാത്രമായിരിക്കും ഈ എൻഡോസ്കോപ്പിക് ചികിത്സ അനുയോജ്യമാണോ എന്ന് മെഡിക്കൽ സംഘം തീരുമാനിക്കുക.