ന്യൂഡൽഹി: ജി.എസ്.ടി പരിഷ്‌കാരങ്ങളിലൂടെയും ആദായനികുതി ഇളവുകളിലൂടെയും ഇന്ത്യക്കാർക്ക് 2.5 ലക്ഷം കോടി രൂപയുടെ ലാഭമുണ്ടാകുമെന്ന് പ്രധാനമന്ത്രി നരേന്ദ്ര മോദി. ഈ മാറ്റങ്ങളെ ഒരു 'സമ്പാദ്യ ഉത്സവം' എന്ന് വിശേഷിപ്പിച്ച അദ്ദേഹം, ഇത് രാജ്യത്തിന്റെ സാമ്പത്തിക മുന്നേറ്റത്തിൽ നിർണായക ചുവടുവെയ്പ്പാണെന്ന് പറഞ്ഞു. നവരാത്രി ദിനത്തിൽ രാജ്യത്തെ അഭിസംബോധന ചെയ്യുകയായിരുന്നു പ്രധാനമന്ത്രി.

​ജി.എസ്.ടി സ്ലാബുകളിൽ മാറ്റം: ചെലവ് കുറയും

​പുതിയ പരിഷ്കാരമനുസരിച്ച് ജി.എസ്.ടി സ്ലാബുകൾ 5%, 18% എന്നിങ്ങനെ രണ്ടായി ചുരുങ്ങും. നിലവിൽ 12% സ്ലാബിലായിരുന്ന 99% ഉത്പന്നങ്ങൾക്കും ഇനി 5% മാത്രം നികുതി നൽകിയാൽ മതി. അതുപോലെ, 28% സ്ലാബിലുണ്ടായിരുന്ന 90% ഉത്പന്നങ്ങൾക്കും 18% നികുതി മതിയാകും.

​ഇതോടെ നിത്യോപയോഗ സാധനങ്ങൾ, കൺസ്യൂമർ ഉത്പന്നങ്ങൾ, ഇലക്ട്രോണിക് ഉത്പന്നങ്ങളായ ടിവി, റഫ്രിജറേറ്റർ, സ്കൂട്ടർ, കാർ എന്നിവയുടെ വില ഗണ്യമായി കുറയും. വീട് നിർമ്മാണത്തിനും യാത്രാചെലവുകൾക്കും കുറവുണ്ടാകും. ഇത് സാധാരണക്കാർക്കും, ഇടത്തരക്കാർക്കും, കർഷകർക്കും, വ്യാപാരികൾക്കും ഒരുപോലെ പ്രയോജനകരമാകും. അതേസമയം, ആഡംബര വസ്തുക്കളുടെ ജി.എസ്.ടി 28% ൽ നിന്ന് 40% ആയി ഉയർത്തിയിട്ടുണ്ട്.

​'മെയ്ഡ് ഇൻ ഇന്ത്യ' ഉത്പന്നങ്ങൾക്ക് മുൻഗണന നൽകണം

​വിദേശ ഉത്പന്നങ്ങളെ ആശ്രയിക്കുന്നത് കുറയ്ക്കാൻ ഇന്ത്യൻ ഉത്പന്നങ്ങൾ വാങ്ങാൻ പ്രധാനമന്ത്രി ആഹ്വാനം ചെയ്തു. എല്ലാ കടകളിലും പ്രാദേശിക ഉത്പന്നങ്ങൾക്ക് മുൻഗണന നൽകണമെന്നും അദ്ദേഹം പറഞ്ഞു. രാജ്യത്തിന്റെ ആവശ്യങ്ങൾ മാറുന്നതനുസരിച്ച് അടുത്ത തലമുറ പരിഷ്കാരങ്ങൾ അനിവാര്യമാണെന്നും അദ്ദേഹം കൂട്ടിച്ചേർത്തു.

​ലോട്ടറിക്ക് നികുതി കൂട്ടി, വില പഴയതുപോലെ

​ജി.എസ്.ടി പരിഷ്കാരത്തിന്റെ ഭാഗമായി ലോട്ടറി ടിക്കറ്റുകളുടെ നികുതി 28% ൽ നിന്ന് 40% ആയി ഉയർത്തിയിട്ടുണ്ട്. എന്നാൽ, ലോട്ടറി ടിക്കറ്റുകളുടെ വിലയിൽ മാറ്റമുണ്ടാകില്ലെന്ന് ലോട്ടറി വകുപ്പ് അറിയിച്ചു. പുതിയ ടിക്കറ്റുകൾക്ക് മാത്രമായിരിക്കും ഈ നികുതി ബാധകമാകുക. ഓണം ബമ്പർ ടിക്കറ്റുകളും ദിവസേനയുള്ള ലോട്ടറി ടിക്കറ്റുകളും നേരത്തെ തന്നെ വിതരണം ചെയ്തതിനാൽ അവ പഴയ വിലയിൽ തന്നെ ലഭ്യമാകും. ഓണം ബമ്പർ നറുക്കെടുപ്പ് സെപ്റ്റംബർ 27 നാണ്.