തിരുവനന്തപുരം: തദ്ദേശ തിരഞ്ഞെടുപ്പ് പ്രചാരണത്തിനിടെ വൻ വിവാദമായ 'പോറ്റിയെ കേറ്റിയേ' എന്ന പാരഡി ഗാനത്തിനെതിരായ നിയമനടപടികളിൽ നിന്ന് സർക്കാർ പിൻവാങ്ങുന്നു. പാട്ടിനെതിരെ കേസെടുത്തത് ആവിഷ്കാര സ്വാതന്ത്ര്യത്തിന് മേലുള്ള കടന്നുകയറ്റമാണെന്ന വ്യാപക വിമർശനവും ദേശീയതലത്തിലുണ്ടായ ചർച്ചകളുമാണ് സർക്കാരിനെ പിന്നോട്ട് വലിച്ചത്.​എഫ്.ഐ.ആർ റദ്ദാക്കും: പരാതിക്കാരനായ പ്രസാദ് കുഴിക്കാലയുടെ മൊഴിയെടുത്ത് കേസ് അവസാനിപ്പിക്കാൻ പോലീസ് തീരുമാനിച്ചു. ഇതിനായി കോടതിയുടെ അനുമതി തേടും.
​തുടർ നടപടികളില്ല: പാട്ട് നീക്കം ചെയ്യണമെന്ന് ആവശ്യപ്പെട്ട് യൂട്യൂബിനോ മെറ്റയ്ക്കോ പോലീസ് കത്തുനൽകില്ല. പാട്ട് പ്രചരിപ്പിക്കുന്നവർക്കെതിരെയും കേസെടുക്കില്ല.
​മറ്റ് പരാതികളും തള്ളി: ഇതേ ഈണത്തിലുള്ള മറ്റ് പാട്ടുകൾക്കെതിരെ ലഭിച്ച പരാതികളിലും കേസെടുക്കേണ്ടെന്ന് എ.ഡി.ജി.പി ജില്ലാ പോലീസ് മേധാവിമാർക്ക് നിർദ്ദേശം നൽകി.
​പിന്മാറ്റത്തിന് പിന്നിൽ:
​മതവിദ്വേഷം വളർത്താൻ ശ്രമിച്ചു എന്നാരോപിച്ച് ഭാരതീയ ന്യായ സംഹിതയിലെ 299, 353(1)(സി) എന്നീ വകുപ്പുകൾ ചുമത്തിയാണ് കേസെടുത്തിരുന്നത്. എന്നാൽ ഈ വകുപ്പുകൾ കോടതിയിൽ നിലനിൽക്കില്ലെന്ന നിയമോപദേശവും തിരിച്ചടിയായി. പാട്ടിനെതിരെയല്ല, അതിലെ ചില പദപ്രയോഗങ്ങൾക്കെതിരെയാണ് തന്റെ പരാതിയെന്ന് പരാതിക്കാരൻ തന്നെ പിന്നീട് മൊഴി നൽകിയതും കേസിന്റെ പ്രസക്തി കുറച്ചു.
​മൈക്ക് കേസിനും സമാന ഗതി
​മുഖ്യമന്ത്രി പ്രസംഗിക്കുമ്പോൾ മൈക്കിൽ 'ഹൗളിംഗ്' ഉണ്ടായതിന്റെ പേരിൽ എടുത്ത കേസും സർക്കാർ നേരത്തെ റദ്ദാക്കിയിരുന്നു. പൊതുസുരക്ഷയെ അപകടപ്പെടുത്തി എന്നാരോപിച്ച് പിടിച്ചെടുത്ത മൈക്കും ആംപ്ലിഫയറും ഉടമയ്ക്ക് തിരികെ നൽകി.
​"കോടതി ഉത്തരവില്ലാതെ പാട്ട് നീക്കം ചെയ്യരുത്"
സർക്കാരിന്റെ സമ്മർദ്ദത്തിന് വഴങ്ങി സോഷ്യൽ മീഡിയ പ്ലാറ്റ്‌ഫോമുകൾ പാട്ട് നീക്കരുതെന്ന് ആവശ്യപ്പെട്ട് പ്രതിപക്ഷ നേതാവ് വി.ഡി. സതീശൻ യൂട്യൂബിനും മെറ്റയ്ക്കും കത്തുനൽകിയിട്ടുണ്ട്.