തിരുവനന്തപുരം: ദാദാസാഹിബ് ഫാൽക്കെ അവാർഡ് 2023-ലെ ജേതാവായ നടൻ  മോഹൻലാലിന് സംസ്ഥാന സർക്കാരിന്റെ ആദരവ് നൽകുന്നതിനായി സംഘടിപ്പിച്ച 'മലയാളം വാനോളം ലാൽ സലാം' എന്ന വമ്പൻ പരിപാടിക്കായി രണ്ട് കോടി രൂപ ചെലവഴിക്കാൻ സർക്കാർ പ്രത്യേക അനുമതി നൽകി ഉത്തരവായി.
​ഒക്ടോബർ 4-ന് തിരുവനന്തപുരത്ത് വെച്ചാണ് ചലച്ചിത്ര, രാഷ്ട്രീയ, സാമൂഹിക മേഖലകളിലെ പ്രമുഖർ പങ്കെടുക്കുന്ന ഈ ആദരവ് ചടങ്ങ് സംഘടിപ്പിക്കുന്നത്. സാംസ്കാരിക വകുപ്പ്, കേരള സംസ്ഥാന ചലച്ചിത്ര വികസന കോർപ്പറേഷൻ (കെ.എസ്.എഫ്.ഡി.സി), കേരള സംസ്ഥാന ചലച്ചിത്ര അക്കാദമി, സാംസ്കാരിക പ്രവർത്തക ക്ഷേമനിധി ബോർഡ് എന്നിവയുടെ സംയുക്ത ആഭിമുഖ്യത്തിലാണ് പരിപാടി.

​ചെലവും ധനവിനിയോഗവും

​മോഹൻലാലിനുള്ള ആദരവ് ചടങ്ങിന്റെ ആകെ ചെലവായി 2.84 കോടി രൂപയാണ് കണക്കാക്കുന്നത്. ഇതിൽ 2 കോടി രൂപ മൂന്ന് വകുപ്പുകളുടെ പദ്ധതിശീർഷകങ്ങളിൽ നിന്നും ചെലവഴിക്കാനും, ബാക്കി 84 ലക്ഷം രൂപ അധിക ധനാനുമതി മുഖേന അനുവദിക്കാനുമാണ് സർക്കാർ തീരുമാനം.

​അനുവദിച്ച തുകയുടെ വിഭജനം ഇപ്രകാരമാണ്:

• ​സാംസ്കാരിക വകുപ്പ് (യുവകലാകാരന്മാർക്കുള്ള വജ്രജൂബിലി ഫെലോഷിപ്പ് ശീർഷകം) 1 കോടി
• ​കെ.എസ്.എഫ്.ഡി.സി — 50 ലക്ഷം
• ​കേരള സംസ്ഥാന ചലച്ചിത്ര അക്കാദമി — 50 ലക്ഷം

​ഈ തുക കേരള സംസ്ഥാന ചലച്ചിത്ര വികസന കോർപ്പറേഷൻ്റെ ട്രഷറി അക്കൗണ്ടിൽ നിക്ഷേപിച്ച്, ആവശ്യത്തിനായി മാത്രമേ വിനിയോഗിക്കാവൂ എന്ന് ഉത്തരവിൽ കർശനമായി നിർദ്ദേശിക്കുന്നു.

​കണക്കുകൾ സമർപ്പിക്കണം

​ചെലവുകളുടെ കണക്കുകൾ കൃത്യമായി സൂക്ഷിക്കുകയും, ആവശ്യമായ രേഖകളും ബില്ലുകളും സാക്ഷ്യപത്രങ്ങളും സാംസ്കാരിക വകുപ്പ് ഡയറക്ടർക്ക് സമർപ്പിക്കുകയും വേണം. തുക ചെലവഴിച്ചു കഴിഞ്ഞാൽ മൂന്ന് മാസത്തിനകം ധനവിനിയോഗ പത്രവും റിക്കൺസിലിയേഷൻ സ്റ്റേറ്റ്മെന്റും സർക്കാർ, സാംസ്കാരിക വകുപ്പ് അദ്ധ്യക്ഷൻ, ധനകാര്യ വകുപ്പ്, അക്കൗണ്ടൻ്റ് ജനറൽ എന്നിവർക്കും സമർപ്പിക്കണമെന്ന് ഉത്തരവിൽ വ്യക്തമാക്കുന്നു.

​കേരള സംസ്ഥാന ചലച്ചിത്ര വികസന കോർപ്പറേഷൻ മാനേജിംഗ് ഡയറക്ടറുടെ നിർദേശവും സാംസ്കാരിക വകുപ്പ് മന്ത്രിയുടെ അധ്യക്ഷതയിൽ സെപ്റ്റംബർ 29-ന് ചേർന്ന യോഗത്തിലെ തീരുമാനവും അടിസ്ഥാനമാക്കിയാണ് സർക്കാർ ഉത്തരവ് പുറപ്പെടുവിച്ചിരിക്കുന്നത്. ഗവർണറുടെ ഉത്തരവിൻ പ്രകാരമാണ് അഡീഷണൽ ചീഫ് സെക്രട്ടറി ഡോ. രാജൻ ഖോബ്രഗഡെ IAS ആണ് ഉത്തരവ് പുറത്തിറക്കിയത്.