ദോഹ: 'വിസിറ്റ് ഖത്തറി'ന്റെ 'ഹലാ സമ്മർ' പ്രചാരണ പരിപാടിയുടെ ഭാഗമായി നടന്ന ഖത്തർ ടോയ് ഫെസ്റ്റിവൽ 2026-ലെ സമ്മർ ക്യാമ്പിൽ പങ്കാളികളായി ജനറൽ ടാക്സ് അതോറിറ്റി (GTA). കുട്ടികളിൽ വിനോദത്തിലൂടെ അറിവ് പകരുന്നതിനും ആരോഗ്യകരമായ ഭക്ഷണശീലങ്ങൾ വളർത്തിയെടുക്കുന്നതിനുമായാണ് ജി.ടി.എ വിസിറ്റ് ഖത്തറുമായി കൈകോർത്തത്.
പഞ്ചസാരയുടെ ഉപയോഗം കുറയ്ക്കേണ്ടതിന്റെ ആവശ്യകതയും, മധുരപാനീയങ്ങൾക്ക് ഏർപ്പെടുത്തിയിട്ടുള്ള എക്സൈസ് നികുതിയുടെ സങ്കൽപ്പവും കുട്ടികൾക്ക് ലളിതമായി മനസ്സിലാക്കിക്കൊടുക്കുന്ന രീതിയിലുള്ള ആശയവിനിമയ പരിപാടികളാണ് ജി.ടി.എ സംഘടിപ്പിച്ചത്. വിവിധ പ്രായക്കാരായ കുട്ടികൾക്കായി പ്രത്യേക വിദ്യാഭ്യാസ ഗെയിമുകളും മത്സരങ്ങളും ഇതോടൊപ്പം ഒരുക്കിയിരുന്നു.തത്സമയ പ്രകടനങ്ങളും കുടുംബങ്ങൾക്കായുള്ള വിവിധ വിനോദ പരിപാടികളും അടങ്ങിയ ഖത്തറിലെ ഏറ്റവും പ്രധാനപ്പെട്ട വേനൽക്കാല ആഘോഷങ്ങളിലൊന്നാണ് ഖത്തർ ടോയ് ഫെസ്റ്റിവൽ. വിദ്യാഭ്യാസവും വിനോദവും സമന്വയിപ്പിച്ച് സമൂഹത്തിന് ഉപകാരപ്രദമായ സന്ദേശങ്ങൾ നൽകാൻ ഇത്തരം കൂട്ടായ്മകൾ സഹായിക്കുമെന്ന് അധികൃതർ വ്യക്തമാക്കി.
