​ദോഹ: ചരിത്രപരമായ പാരമ്പര്യത്തിലും വിശ്വാസം, ഭാഷ, പങ്കുവെക്കപ്പെട്ട ലക്ഷ്യങ്ങൾ എന്നിവയിലധിഷ്ഠിതമായും വളർന്നുവന്ന ഖത്തറും ഒമാനും തമ്മിലുള്ള സഹോദരബന്ധം ഉഭയകക്ഷി താൽപ്പര്യങ്ങളുടെ പുതിയ ചക്രവാളങ്ങളിലേക്ക് മുന്നേറുന്നു. ഇരു രാജ്യങ്ങളിലെയും ഉന്നത നേതൃത്വങ്ങളുടെയും ജനങ്ങളുടെയും പരസ്പര ബഹുമാനമാണ് ഈ ദൃഢബന്ധത്തിന്റെ കരുത്ത്.
​1970-കളുടെ തുടക്കത്തിലാണ് ഇരു രാജ്യങ്ങളും തമ്മിലുള്ള ആധുനിക നയതന്ത്ര ബന്ധങ്ങൾക്ക് തുടക്കമാകുന്നത്. 1973-ൽ ഒമാനിലേക്കുള്ള ആദ്യ ഖത്തർ അംബാസഡറെ നിയമിക്കുകയും, 1974-ൽ ആദ്യ ഒമാനി അംബാസഡർ ദോഹയിൽ ചുമതലയേൽക്കുകയും ചെയ്തു.അമീർ ശൈഖ് തമീം ബിൻ ഹമദ് അൽതാനിയുടെ 2013 ഒക്ടോബറിലെയും 2025 ജനുവരിയിലെയും മസ്കറ്റ് സന്ദർശനങ്ങളും, ഒമാൻ സുൽത്താൻ ഹൈതം ബിൻ താരീഖിന്റെ 2021 നവംബറിലെ ദോഹ സന്ദർശനവും ഉഭയകക്ഷി ബന്ധത്തിൽ നിർണായക നാഴികക്കല്ലുകളായി. സാമ്പത്തികം, സൈനികം, ടൂറിസം, ഗതാഗതം എന്നീ മേഖലകളിൽ നിരവധി ധാരണാപത്രങ്ങളിലാണ് ഇരു രാജ്യങ്ങളും ഒപ്പുവെച്ചിട്ടുള്ളത്.
​പ്രാദേശികവും അന്തർദേശീയവുമായ വിഷയങ്ങളിൽ, പ്രത്യേകിച്ച് ഫലസ്തീൻ പ്രശ്നം, ഹോർമുസ് കടലിടുക്കിലെയും മേഖലയിലെയും സമാധാന ശ്രമങ്ങൾ എന്നിവയിൽ ഇരു രാജ്യങ്ങൾക്കും ഒരേ നിലപാടാണുള്ളത്. 1981-ൽ രൂപീകൃതമായ ജി.സി.സി (GCC) കൂട്ടായ്മയിൽ സജീവ പങ്കാളികളായ ഇരു രാജ്യങ്ങളും ഗൾഫ് മേഖലയുടെ സുരക്ഷക്കും പുരോഗതിക്കും ഒന്നിച്ച് പ്രവർത്തിക്കുന്നു.
​വ്യാപാര, സാമ്പത്തിക വളർച്ച
​1995-ൽ രൂപീകരിച്ച ഖത്തർ - ഒമാൻ ജോയിന്റ് കമ്മിറ്റി ഉഭയകക്ഷി നിക്ഷേപങ്ങൾക്ക് വലിയ പങ്കാണ് വഹിക്കുന്നത്.ഒമാനിലെ ഖത്തറി നിക്ഷേപങ്ങളിൽ 12 ശതമാനം വർദ്ധന രേഖപ്പെടുത്തി 730 മില്യൺ ഒമാനി റിയാലിലെത്തി. വ്യാവസായിക, സേവന, ടൂറിസം, റിയൽ എസ്റ്റേറ്റ് മേഖലകളിലായി 15-ഓളം പ്രധാന ഖത്തറി കമ്പനികൾ ഒമാനിൽ പ്രവർത്തിക്കുന്നുണ്ട്.ഖത്തറി വിപണിയിലും നൂറുകണക്കിന് ഒമാനി കമ്പനികൾ വാണിജ്യ, കരാർ, സേവന മേഖലകളിൽ സജീവമാണ്.
​ഖത്തർ നാഷണൽ വിഷൻ 2030, ഒമാൻ വിഷൻ 2040 എന്നിവയ്ക്ക് അനുസൃതമായി ഭക്ഷ്യസുരക്ഷ, പുനരുപയോഗ ഊർജ്ജം, ലോജിസ്റ്റിക്സ്, ടൂറിസം എന്നീ മേഖലകളിൽ പങ്കാളിത്തം കൂടുതൽ ശക്തിപ്പെടുത്താനാണ് ഇരു രാജ്യങ്ങളുടെയും തീരുമാനം.രാഷ്ട്രീയ-സാമ്പത്തിക മേഖലകൾക്ക് പുറമെ സാംസ്കാരിക, വിദ്യാഭ്യാസ രംഗങ്ങളിലും ഇരു രാജ്യങ്ങളും തമ്മിൽ ശക്തമായ സഹകരണമുണ്ട്. 2024-ലെ ദോഹ അന്താരാഷ്ട്ര പുസ്തകോത്സവത്തിൽ ഒമാനെ 'അതിഥി രാജ്യം' (Guest of Honour) ആയി തിരഞ്ഞെടുത്തത് സാംസ്കാരിക ബന്ധത്തിന്റെ ആഴം വ്യക്തമാക്കുന്നു.
​ഇരു രാജ്യങ്ങളുടെയും ദീർഘവീക്ഷണമുള്ള നേതൃത്വത്തിന് കീഴിൽ, വരും വർഷങ്ങളിൽ നിക്ഷേപങ്ങളിലടക്കം കൂടുതൽ പങ്കാളിത്തം ഉറപ്പാക്കാനും ഗൾഫ് മേഖലയുടെ സമാധാനത്തിനും സമൃദ്ധിക്കും ഒരുമിച്ച് മുന്നേറാനും സാധിക്കുമെന്നാണ് പ്രതീക്ഷിക്കുന്നത്.