ന്യൂഡൽഹി: ദേശീയ കമ്പനി നിയമ അപ്പീൽ ട്രൈബ്യൂണലിന്റെ (എൻ.സി.എൽ.എ.ടി.) പുതിയ അധ്യക്ഷനായി മുൻ സുപ്രീംകോടതി ജഡ്ജി ജസ്റ്റിസ് രാജേഷ് ബിന്ദലിനെ നിയമിച്ചു.
ജസ്റ്റിസ് അശോക് ഭൂഷണിന്റെ കാലാവധി പൂർത്തിയായതിനെത്തുടർന്ന് 2026 ജൂലൈ മുതൽ ജസ്റ്റിസ് യോഗേഷ് ഖന്ന ആക്ടിങ് അധ്യക്ഷനായി പ്രവർത്തിച്ചുവരികയായിരുന്നു. സ്ഥിരം അധ്യക്ഷന്റെ നിയമനം വരുന്നതുവരെയുള്ള ഈ ക്രമീകരണത്തിനാണ് പുതിയ നിയമനത്തോടെ വിരാമമാകുന്നത്.
2023 ഫെബ്രുവരി 13-ന് സുപ്രീംകോടതി ജഡ്ജിയായി ചുമതലയേറ്റ ജസ്റ്റിസ് ബിന്ദൽ, 2026 ഏപ്രിൽ 15-നാണ് വിരമിച്ചത്. വിവിധ ഹൈക്കോടതികളിൽ ജഡ്ജിയായും ചീഫ് ജസ്റ്റിസായും പ്രവർത്തിച്ച അനുഭവസമ്പത്തുമായാണ് അദ്ദേഹം പുതിയ ചുമതലയിലെത്തുന്നത്.
2006-ൽ പഞ്ചാബ്–ഹരിയാന ഹൈക്കോടതി ജഡ്ജിയായി നിയമിതനായ അദ്ദേഹം 2018-ൽ ജമ്മു കശ്മീർ ഹൈക്കോടതിയിലേക്ക് സ്ഥലംമാറ്റപ്പെട്ടു. 2020 ഡിസംബറിൽ അവിടെ ആക്ടിങ് ചീഫ് ജസ്റ്റിസായി സേവനമനുഷ്ഠിച്ചു. തുടർന്ന് 2021 ജനുവരിയിൽ കൽക്കട്ട ഹൈക്കോടതി ജഡ്ജിയായും അതേ വർഷം ഏപ്രിലിൽ ആക്ടിങ് ചീഫ് ജസ്റ്റിസായും ചുമതലയേറ്റു.
2021 ഒക്ടോബർ 11-ന് അലഹബാദ് ഹൈക്കോടതി ചീഫ് ജസ്റ്റിസായി സത്യപ്രതിജ്ഞ ചെയ്ത അദ്ദേഹം, ആ സ്ഥാനത്തുനിന്നാണ് 2023-ൽ സുപ്രീംകോടതിയിലേക്ക് ഉയർത്തപ്പെട്ടത്.
സുപ്രീംകോടതിയിൽനിന്ന് വിരമിച്ചശേഷം നാഷണൽ ഫോറൻസിക് സയൻസസ് സർവകലാശാലയിൽ എമിറിറ്റസ് പ്രൊഫസറായും ഗൽഗോട്ടിയാസ് സർവകലാശാലയിലെ നിയമവിഭാഗത്തിൽ ഓണററി ഡിസ്റ്റിംഗ്വിഷ്ഡ് ജൂറിസ്റ്റായും നിയമിതനായിരുന്നു.
