തിരുവനന്തപുരം:​സംസ്ഥാന വനം വന്യജീവി വകുപ്പിലെ സംരക്ഷണ വിഭാഗം ജീവനക്കാരുടെയും ഫോറസ്റ്റ് ഡ്രൈവർമാരുടെയും യൂണിഫോം ചട്ടങ്ങളിൽ ഭേദഗതി വരുത്തി സർക്കാർ ഉത്തരവിറക്കി. ജൂലൈ എട്ടാം തീയതി പുറപ്പെടുവിച്ച ഉത്തരവ് പ്രകാരം വനം വകുപ്പിലെ വിവിധ തസ്തികകളിലുള്ളവരുടെ പദവി ചിഹ്നങ്ങളിലും ബാഡ്ജുകളിലുമാണ് പ്രധാന മാറ്റങ്ങൾ വരുത്തിയിരിക്കുന്നത്.
​വനം വന്യജീവി വകുപ്പ് സെക്രട്ടറി കെ. ബിജു ഐ.എ.എസ് ആണ് ഗവർണറുടെ ഉത്തരവിൻ പ്രകാരം ഇതുസംബന്ധിച്ച വിജ്ഞാപനം പുറപ്പെടുവിച്ചത്.
​പ്രധാന ഭേദഗതികൾ 
​ഡെപ്യൂട്ടി റേഞ്ച് ഫോറസ്റ്റ് ഓഫീസർമാർ:
റേഞ്ച് ഫോറസ്റ്റ് ഓഫീസറായി ഗ്രേഡ് ഡെസിഗ്നേഷൻ ലഭിച്ച ഡെപ്യൂട്ടി റേഞ്ച് ഫോറസ്റ്റ് ഓഫീസർമാർ, സ്റ്റേറ്റ് സർവീസിലുള്ള റേഞ്ച് ഫോറസ്റ്റ് ഓഫീസർ തസ്തികയുടെ പദവി ചിഹ്നമായ 'KFS' എന്ന മുദ്ര ഉപയോഗിക്കാൻ പാടില്ല. പകരം, സബോർഡിനേറ്റ് സർവീസിൽപ്പെട്ട സംരക്ഷണ വിഭാഗം ജീവനക്കാരുടെ പദവി ചിഹ്നമായ 'KF' എന്ന മുദ്രയും വനം വകുപ്പിന്റെ അടയാള റിബണും മാത്രമേ ധരിക്കാൻ പാടുള്ളൂ.
​ഫോറസ്റ്റ് ഡ്രൈവർമാർ:
ഫോറസ്റ്റ് ഡ്രൈവർ ഗ്രേഡ് II, ഗ്രേഡ് I, സീനിയർ ഗ്രേഡ്, സെലക്ഷൻ ഗ്രേഡ് എന്നീ തസ്തികകളിൽ ഉള്ളവർക്ക് നിലവിലുണ്ടായിരുന്ന 'V' ആകൃതിയിലുള്ള ഷോൾഡർ ബാഡ്ജുകൾ പൂർണ്ണമായും ഒഴിവാക്കി. പകരം ആകർഷകമായ പുതിയ പൊതുവായ ബാഡ്ജ് നിശ്ചയിച്ചു.
​പുതിയ ഷോൾഡർ ബാഡ്ജിന്റെ പ്രത്യേകതകൾ:
​അളവ്: 100 മി.മീ നീളവും 80 മി.മീ വീതിയും ഉള്ളതായിരിക്കും ബാഡ്ജ്.
​ഡിസൈൻ: ബാഡ്ജിന്റെ പുറംവലയത്തിൽ 5 മി.മീ വീതിയിൽ ചുവപ്പും പച്ചയും ബോർഡർ ഉണ്ടായിരിക്കും. ഉൾഭാഗം വെളുത്ത നിറത്തിലായിരിക്കും.
​ലോഗോയും എഴുത്തും: വെളുത്ത പശ്ചാത്തലത്തിന്റെ മധ്യത്തിലായി ഒലീവ് ഗ്രീൻ നിറത്തിൽ വനം വകുപ്പിന്റെ എംബ്ലം ഉണ്ടായിരിക്കും. ഇതിന് മുകളിലായി 'KERALA FOREST DEPARTMENT' എന്നും താഴെ 'FOREST DRIVER' എന്നും കറുത്ത നിറത്തിൽ രേഖപ്പെടുത്തിയ വെൽവെറ്റ് തുണിയിലുള്ള ബാഡ്ജ് ആയിരിക്കണം ഇത്. ഡ്രൈവർമാർ ഈ ബാഡ്ജ് തങ്ങളുടെ ഇടത് ഷോൾഡറിൽ ഖാക്കി നൂൽ ഉപയോഗിച്ച് തുന്നിപ്പിടിപ്പിക്കേണ്ടതാണ്.
​ചട്ടങ്ങളിൽ ഭേദഗതി വരുത്തുന്നത് വരെ നിലവിലുള്ള രീതിയിൽ യൂണിഫോം ധരിക്കാൻ അഡീഷണൽ പ്രിൻസിപ്പൽ ചീഫ് ഫോറസ്റ്റ് കൺസർവേറ്റർ (ഭരണം) മുൻപ് നൽകിയ നിർദ്ദേശത്തിന് സർക്കാർ ഈ ഉത്തരവിലൂടെ സാധൂകരണവും നൽകിയിട്ടുണ്ട്.