ദോഹ: ഗാന്ധി ജയന്തി ആഘോഷങ്ങളുടെ ഭാഗമായി ഇന്ത്യൻ എംബസിയും ഇന്ത്യൻ കൾച്ചറൽ സെന്ററും (ICC) സംയുക്തമായി “Resilient Earth, Responsible Living – The Gandhian Way” എന്ന വിഷയത്തിൽ അവബോധ സിമ്പോസിയം ബിർള പബ്ലിക് സ്‌കൂൾ ഓഡിറ്റോറിയത്തിൽ സംഘടിപ്പിച്ചു.
മഹാത്മാഗാന്ധിയുടെ ലളിതജീവിതവും ഉത്തരവാദിത്വമുള്ള ജീവിതശൈലിയും പ്രചോദനമാക്കി, സുസ്ഥിരതയും കാലാവസ്ഥാ പ്രതിരോധശേഷിയും സംബന്ധിച്ച് സമൂഹത്തിൽ ബോധവൽക്കരണം സൃഷ്ടിക്കുകയും കൂട്ടായ പ്രവർത്തനങ്ങൾക്ക് പ്രചോദനം നൽകുകയും ചെയ്യുകയായിരുന്നു സിമ്പോസിയത്തിന്റെ ലക്ഷ്യം. ICC പ്രസിഡന്റ് എ പി മണികണ്ഠൻ അധ്യക്ഷതവഹിച്ചപരിപാടി HR, അഡ്മിൻ & കോൺസുലർ തലവൻ രാകേഷ് വാഘ് ഉദ്ഘാടനം ചെയ്തു. എംബസിയുടെ വിദ്യാഭ്യാസ-സാംസ്കാരിക വിഭാഗം ഫസ്റ്റ് സെക്രട്ടറി ഹരീഷ് പാണ്ഡെ മുഖ്യാതിഥിയായിരുന്നു. 

വിവിധ വിഷയങ്ങളിൽ വിദഗ്ധർ പ്രഭാഷണങ്ങൾ നടത്തി. ഹെമന്ത് നന്ദൻ പവാർ “Driving Sustainable Development through Climate Finance” എന്ന വിഷയത്തിൽ സംസാരിച്ചു. അശ്വിൻ മാധുസൂദനൻ “Culture Meets Climate – Decarbonization Strategies for a Sustainable Future” അവതരിപ്പിച്ചു. ഡോ. രവി രംഗരാജൻ “Water Security and Conservation” എന്ന വിഷയത്തിലും ഡോ. അനുജോസ്സൻ “Building Climate-Resilient Futures – The Role of Business, Economy and Education” എന്ന വിഷയത്തിലും പ്രഭാഷണം നടത്തി.
ബിർള പബ്ലിക് സ്‌കൂൾ വിദ്യാർത്ഥികൾ അവതരിപ്പിച്ച “Protecting the Ozone, Protecting Our Future” എന്ന സംഗീതനാടകം ശ്രദ്ധേയമായി. ഡോ. ബിമലേന്ദു ബി. നാഥ് (ഡയറക്ടർ, MIE-SPPU ഇൻസ്റ്റിറ്റ്യൂട്ട് ഓഫ് ഹൈയർ എജുക്കേഷൻ) സമാപന പ്രസംഗം നടത്തി.  ICC ജനറൽ സെക്രട്ടറി എബ്രഹാം കെ. ജോസഫ്,  വൈസ് പ്രസിഡന്റ് ശാന്തനു ദേശ്പാണ്ഡെ എന്നിവർ സാന്നിധ്യം വഹിച്ചു.
ഖത്തറിലെ വിവിധ ഇന്ത്യൻ സ്കൂളുകളിൽ നിന്നുള്ള വിദ്യാർത്ഥികൾ പങ്കെടുത്ത ചടങ്ങിൽ എംബസിയുടെ സെക്കൻഡ് സെക്രട്ടറി (Information, Culture & Education) ബിന്ദു എൻ. നായർ, ICBF പ്രസിഡന്റ് ഷാനവാസ് ബാവ, ISC പ്രസിഡന്റ് ഇ.പി. അബ്ദുറഹ്‌മാൻ, ICC അഡ്വൈസറി കൗൺസിൽ പ്രസിഡന്റ് പി.എൻ. ബാബുരാജൻ, ബിർള സ്‌കൂൾ പ്രിൻസിപ്പൽ ആനന്ദ് നായർ, ഐസിസി മാനേജിംഗ് കമ്മിറ്റിയംഗങ്ങൾ, സഹ സംഘടനാ പ്രസിഡന്റുമാർ, മുതിർന്ന സമൂഹ നേതാക്കൾ എന്നിവർ സംസാരിച്ചു.