ദോഹ/ന്യൂഡൽഹി: ഇന്ത്യൻ വിപണിയിലെ നിക്ഷേപ സാധ്യതകൾ പ്രയോജനപ്പെടുത്താൻ ഖത്തറി നിക്ഷേപകരെ ക്ഷണിച്ച് കേന്ദ്ര ധനമന്ത്രി നിർമല സീതാരാമൻ. ഇരുരാജ്യങ്ങളും തമ്മിലുള്ള ഉഭയകക്ഷി നിക്ഷേപ കരാറും (BIT) സ്വതന്ത്ര വ്യാപാര കരാറും (FTA) വേഗത്തിലാക്കാൻ ഇന്ത്യയും ഖത്തറും ധാരണയിലെത്തി. ഖത്തർ ഇൻവെസ്റ്റ്‌മെന്റ് അതോറിറ്റിയുടെ ഓഫീസ് ഇന്ത്യയിൽ ആരംഭിക്കുന്നതിനും ഇന്ത്യയിലെ 10 ബില്യൺ ഡോളറിന്റെ നിക്ഷേപ പദ്ധതികളുമായി മുന്നോട്ട് പോകുന്നതിനും ഇരുരാജ്യങ്ങളും തീരുമാനിച്ചു.
ജാപ്പനീസ് റേറ്റിംഗ് ഏജൻസി ഇന്ത്യയുടെ ദീർഘകാല ക്രെഡിറ്റ് റേറ്റിംഗ് 'BBB+' ൽ നിന്ന് 'A-' ആയി ഉയർത്തിയത് രാജ്യത്തിന്റെ സാമ്പത്തിക ഭദ്രതയ്ക്ക് തെളിവാണെന്ന് ധനമന്ത്രി വ്യക്തമാക്കി. 2026 സാമ്പത്തിക വർഷത്തിൽ 94.53 ബില്യൺ ഡോളറിന്റെ നേരിട്ടുള്ള വിദേശ നിക്ഷേപമാണ് (FDI) ഇന്ത്യ നേടിയത്. കഴിഞ്ഞ 15 വർഷത്തിനിടയിലെ ഏറ്റവും ഉയർന്ന നിരക്കാണിത്.
ഇന്ത്യൻ വിപണി വിദേശ നിക്ഷേപകർക്ക് മികച്ച അവസരങ്ങളാണ് നൽകുന്നതെന്നും ആവശ്യമായ എല്ലാ സൗകര്യങ്ങളും കേന്ദ്രസർക്കാർ ഉറപ്പുനൽകുന്നുണ്ടെന്നും അവർ കൂട്ടിച്ചേർത്തു. കരാറുകൾക്ക് അന്തിമരൂപം നൽകുന്നതിനായി ന്യൂഡൽഹിയിൽ നടന്ന ഉഭയകക്ഷി ചർച്ചകളിലാണ് ഈ തീരുമാനങ്ങൾ ഉണ്ടായത്.
