തിരുവനന്തപുരം: സംസ്ഥാനത്ത് അതിതീവ്ര മഴയ്ക്ക് സാധ്യതയുള്ളതിനാൽ വിവിധ ജില്ലകളിൽ കാലാവസ്ഥാ മുന്നറിയിപ്പ് പ്രഖ്യാപിച്ചു. ഞായറാഴ്ച (ഒക്ടോബർ 25) കോഴിക്കോട്, വയനാട്, മലപ്പുറം ജില്ലകളിൽ റെഡ് അലർട്ടാണ്. തിങ്കളാഴ്ച (ഒക്ടോബർ 26) പാലക്കാട്, ഇടുക്കി ജില്ലകളിലും റെഡ് അലർട്ട് പ്രഖ്യാപിച്ചിട്ടുണ്ട്. ഞായറാഴ്ച 10 ജില്ലകളിലും തിങ്കളാഴ്ച അഞ്ച് ജില്ലകളിലും ഓറഞ്ച് അലർട്ടും പ്രഖ്യാപിച്ചു.

കുറഞ്ഞ സമയത്തിനുള്ളിൽ വലിയ അളവിൽ മഴ പെയ്യാൻ സാധ്യതയുള്ളതിനാൽ മലവെള്ളപ്പാച്ചിൽ, മിന്നൽപ്രളയം, നഗരങ്ങളിലും താഴ്ന്ന പ്രദേശങ്ങളിലും വെള്ളക്കെട്ട് എന്നിവയ്ക്ക് സാധ്യതയുണ്ടെന്ന് അധികൃതർ മുന്നറിയിപ്പ് നൽകി. തുടർച്ചയായ മഴ മണ്ണിടിച്ചിലിനും ഉരുൾപൊട്ടലിനും കാരണമായേക്കാം. പൊതുജനങ്ങളും സർക്കാർ സംവിധാനങ്ങളും അതീവ ജാഗ്രത പാലിക്കണമെന്നും നിർദേശമുണ്ട്.

ജില്ലകളിലെ മഴ മുന്നറിയിപ്പ്

റെഡ് അലർട്ട്

ഒക്ടോബർ 25: മലപ്പുറം, കോഴിക്കോട്, വയനാട്

ഒക്ടോബർ 26: ഇടുക്കി, പാലക്കാട്

ഓറഞ്ച് അലർട്ട്

ഒക്ടോബർ 25: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, കണ്ണൂർ

ഒക്ടോബർ 26: പത്തനംതിട്ട, കോട്ടയം, എറണാകുളം, തൃശൂർ, മലപ്പുറം

മഞ്ഞ അലർട്ട്

ഒക്ടോബർ 25: കാസർകോട്

ഒക്ടോബർ 26: തിരുവനന്തപുരം, കൊല്ലം, ആലപ്പുഴ, കോഴിക്കോട്, വയനാട്

ഒക്ടോബർ 27: പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം

മലയോര മേഖലകളിൽ പ്രത്യേക ജാഗ്രത

ശക്തമായ മഴ ലഭിക്കുന്ന മലയോര മേഖലകളിൽ മണ്ണിടിച്ചിൽ, ഉരുൾപൊട്ടൽ, മലവെള്ളപ്പാച്ചിൽ എന്നിവയ്ക്ക് സാധ്യതയുള്ള പ്രദേശങ്ങളിൽ താമസിക്കുന്നവർ സുരക്ഷിത കേന്ദ്രങ്ങളിലേക്ക് മാറണം. സാധ്യമെങ്കിൽ പകൽ സമയത്തുതന്നെ താമസം മാറ്റാൻ തയ്യാറാകണം. വെള്ളക്കെട്ട് പതിവായ താഴ്ന്ന പ്രദേശങ്ങളിലുള്ളവർ സാഹചര്യം വിലയിരുത്തി ദുരിതാശ്വാസ ക്യാംപുകളിലേക്ക് മാറണമെന്നും നിർദേശമുണ്ട്.

ശക്തമായ കാറ്റിന് സാധ്യതയുള്ളതിനാൽ ബലക്ഷയമുള്ള വീടുകളിലും മേൽക്കൂര ഉറപ്പില്ലാത്ത വീടുകളിലും താമസിക്കുന്നവർ പ്രത്യേകം ശ്രദ്ധിക്കണം. അപകടാവസ്ഥയിലുള്ള മരങ്ങൾ, വൈദ്യുതിത്തൂണുകൾ, പരസ്യബോർഡുകൾ, മതിലുകൾ എന്നിവ സുരക്ഷിതമാക്കണം. അപകടകരമായ സാഹചര്യങ്ങൾ അധികൃതരുടെ ശ്രദ്ധയിൽപ്പെടുത്തുകയും വേണം.

യാത്രകളും ജലാശയങ്ങളിലേക്കുള്ള പ്രവേശനവും ഒഴിവാക്കണം

മഴ ശക്തമാകുമ്പോൾ അത്യാവശ്യമല്ലാത്ത യാത്രകൾ പരമാവധി ഒഴിവാക്കണം. മലയോര മേഖലകളിലേക്കുള്ള രാത്രി യാത്ര പൂർണമായി ഒഴിവാക്കണമെന്നും വെള്ളച്ചാട്ടങ്ങൾ, ജലാശയങ്ങൾ, മലയോര വിനോദസഞ്ചാര കേന്ദ്രങ്ങൾ എന്നിവിടങ്ങളിലേക്കുള്ള യാത്ര മഴ മുന്നറിയിപ്പ് പിൻവലിക്കുന്നതുവരെ ഒഴിവാക്കണമെന്നും നിർദേശമുണ്ട്.

ശക്തമായ മഴ പെയ്യുമ്പോൾ നദികൾ മുറിച്ചുകടക്കരുത്. നദികളിലും മറ്റ് ജലാശയങ്ങളിലും കുളിക്കാനോ മീൻപിടിക്കാനോ മറ്റ് ആവശ്യങ്ങൾക്കായോ ഇറങ്ങരുത്. ജലാശയങ്ങൾക്ക് മുകളിലുള്ള പാലങ്ങളിൽ കയറി കാഴ്ച കാണുന്നതും സെൽഫിയെടുക്കുന്നതും കൂട്ടംകൂടി നിൽക്കുന്നതും ഒഴിവാക്കണം. വെള്ളക്കെട്ടുള്ള റോഡുകളിലൂടെയും അറ്റകുറ്റപ്പണികൾ നടക്കുന്ന റോഡുകളിലൂടെയും യാത്ര ചെയ്യുമ്പോൾ ജാഗ്രത പാലിക്കണം.

തീരദേശത്തും വൈദ്യുതി ലൈനുകൾക്ക് സമീപവും ജാഗ്രത

കടലാക്രമണം ശക്തമാകാൻ സാധ്യതയുള്ളതിനാൽ തീരദേശവാസികൾ ജാഗ്രത പാലിക്കണം. ആവശ്യമായ സാഹചര്യത്തിൽ സുരക്ഷിത കേന്ദ്രങ്ങളിലേക്ക് മാറുകയും മത്സ്യബന്ധന ഉപകരണങ്ങൾ സുരക്ഷിതമായി സൂക്ഷിക്കുകയും വേണം.

കാറ്റിൽ മരങ്ങളും വൈദ്യുതിത്തൂണുകളും കടപുഴകി വീഴാനുള്ള സാധ്യതയുള്ളതിനാൽ അപകടകരമായ ഇടങ്ങളിൽ നിന്ന് മാറിനിൽക്കണം. വൈദ്യുതി ലൈനുകൾ പൊട്ടിവീണിട്ടുണ്ടാകാൻ സാധ്യതയുള്ളതിനാൽ വെള്ളക്കെട്ടുകളിലേക്ക് ഇറങ്ങുന്നതിന് മുമ്പ് വൈദ്യുതാപകട സാധ്യതയില്ലെന്ന് ഉറപ്പാക്കണം. വൈദ്യുതി ലൈനുകളുമായി ബന്ധപ്പെട്ട അപകടസാധ്യത ശ്രദ്ധയിൽപ്പെട്ടാൽ കെഎസ്ഇബിയുടെ 1912 എന്ന നമ്പറിൽ അറിയിക്കാം.

ദുരിതാശ്വാസ ക്യാംപുകളും അടിയന്തര കിറ്റും തയ്യാറാക്കണം

റെഡ്, ഓറഞ്ച് അലർട്ടുള്ള ജില്ലകളിൽ മഴ തുടരുന്ന സാഹചര്യത്തിൽ ദുരിതാശ്വാസ ക്യാംപുകൾ മുൻകൂട്ടി സജ്ജമാക്കാൻ നിർദേശമുണ്ട്. ക്യാംപിനായി കണ്ടെത്തിയ കെട്ടിടം ഏതാണെന്നും അവിടേക്ക് എത്താനുള്ള സുരക്ഷിതമായ വഴി ഏതാണെന്നും പ്രദേശവാസികൾ റവന്യൂ, തദ്ദേശസ്ഥാപന അധികൃതരിൽനിന്ന് മനസ്സിലാക്കണം.

ദുരന്തസാധ്യതയുള്ള പ്രദേശങ്ങളിൽ താമസിക്കുന്നവർ ഭക്ഷണം, കുടിവെള്ളം, മരുന്നുകൾ, ടോർച്ച്, ബാറ്ററികൾ, പ്രധാന രേഖകൾ തുടങ്ങിയവ ഉൾപ്പെടുത്തി അടിയന്തര കിറ്റ് തയ്യാറാക്കി വയ്ക്കണം. കിറ്റ് തയ്യാറാക്കുന്നതിനുള്ള മാർഗനിർദേശങ്ങൾ കേരള സംസ്ഥാന ദുരന്തനിവാരണ അതോറിറ്റിയുടെ വെബ്സൈറ്റിൽ ലഭ്യമാണ്.

കേരളത്തിലെ എല്ലാ ജില്ലകളിലും 24 മണിക്കൂറും പ്രവർത്തിക്കുന്ന താലൂക്ക്, ജില്ലാ കൺട്രോൾ റൂമുകളുണ്ട്. അടിയന്തര സഹായത്തിനും അപകടസാധ്യത അറിയിക്കുന്നതിനും 1077, 1070 എന്നീ ടോൾ ഫ്രീ നമ്പറുകളിൽ ബന്ധപ്പെടാം. ശക്തമായ കാറ്റുമായി ബന്ധപ്പെട്ട മുൻകരുതൽ നിർദേശങ്ങൾ ഇവിടെ ലഭ്യമാണ്.