ദോഹ: മുനിസിപ്പാലിറ്റി മന്ത്രാലയം സംഘടിപ്പിക്കുന്ന 2026-ലെ റമദാൻ ഫുട്ബോൾ ചാമ്പ്യൻഷിപ്പിന് അൽ സദ്ദ് ക്ലബ് സ്റ്റേഡിയത്തിൽ ആവേശകരമായ തുടക്കം. മന്ത്രാലയത്തിന് കീഴിലെ വിവിധ വകുപ്പുകളെയും മുനിസിപ്പാലിറ്റികളെയും പ്രതിനിധീകരിച്ച് നിരവധി ടീമുകളാണ് ടൂർണമെന്റിൽ മാറ്റുരയ്ക്കുന്നത്. ജീവനക്കാർക്കിടയിൽ സ്പോർട്സ്മാൻ സ്പിരിറ്റും സഹകരണവും വളർത്തുക എന്ന ലക്ഷ്യത്തോടെയാണ് ഈ വാർഷിക കായിക മേള സംഘടിപ്പിക്കുന്നത്.
ഞായറാഴ്ച നടന്ന ഉദ്ഘാടന മത്സരങ്ങളിൽ വൻ ഗോൾ വർഷമാണ് കണ്ടത്. ആദ്യ മത്സരത്തിൽ ദോഹ മുനിസിപ്പാലിറ്റി ടീമിനെ ഒന്നിനെതിരെ ആറ് ഗോളുകൾക്ക് (6-1) കാർഷിക കാര്യ-ഭക്ഷ്യ സുരക്ഷാ വിഭാഗം പരാജയപ്പെടുത്തി. മറ്റൊരു ആവേശകരമായ പോരാട്ടത്തിൽ അൽ റയ്യാൻ മുനിസിപ്പാലിറ്റിയെ മൂന്നിനെതിരെ അഞ്ച് ഗോളുകൾക്ക് (5-3) തകർത്ത് അൽ ഖോർ മുനിസിപ്പാലിറ്റി തങ്ങളുടെ ആദ്യ വിജയം സ്വന്തമാക്കി.
മാർച്ച് ആദ്യവാരം വരെ ടൂർണമെന്റ് തുടരും. വരും ദിവസങ്ങളിലും വിവിധ മുനിസിപ്പാലിറ്റികൾ തമ്മിലുള്ള ആവേശകരമായ മത്സരങ്ങൾ നടക്കുമെന്ന് സംഘാടകർ അറിയിച്ചു.
