ദോഹ: ഖത്തറിന്റെ മധ്യമേഖലയിലും പരിസര പ്രദേശങ്ങളിലുമുള്ള ഉൾനാടൻ വന്യജീവി മേഖലകളിൽ (Qatari hinterland) പരിസ്ഥിതി മന്ത്രാലയം (MoECC) നടത്തിയ മിന്നൽ പരിശോധനയിൽ നിരവധി നിയമലംഘനങ്ങൾ കണ്ടെത്തി. മന്ത്രാലയത്തിന് കീഴിലുള്ള വൈൽഡ് ലൈഫ് പ്രൊട്ടക്ഷൻ ഡിപ്പാർട്ട്‌മെന്റാണ് പരിശോധനയ്ക്ക് നേതൃത്വം നൽകിയത്.
കൃത്യമായ ലൈസൻസില്ലാതെ താൽക്കാലിക സൗകര്യങ്ങളും കെട്ടിടങ്ങളും നിർമ്മിക്കുക, ഒട്ടകങ്ങളെ മേയ്ക്കുന്നതിനുള്ള നിരോധന നിയമം ലംഘിക്കുക, നിശ്ചിതയിടങ്ങളിലല്ലാതെ മാലിന്യങ്ങൾ നിക്ഷേപിക്കുക തുടങ്ങിയ ഗുരുതരമായ നിയമലംഘനങ്ങളാണ് പരിശോധനയിൽ കണ്ടെത്തിയത്.ഖത്തറിന്റെ വന്യജീവി സമ്പത്തും പ്രകൃതിദത്ത വാസസ്ഥലങ്ങളും ദോഷകരമായ പ്രവണതകളിൽ നിന്ന് സംരക്ഷിക്കുന്നതിനായി മന്ത്രാലയം നടത്തിവരുന്ന നിരന്തരമായ ശ്രമങ്ങളുടെ ഭാഗമായാണ് ഈ പരിശോധനയെന്ന് അധികൃതർ വ്യക്തമാക്കി. രാജ്യത്തെ പ്രകൃതിവിഭവങ്ങൾ വരുംതലമുറയ്ക്കായി കാത്തുസൂക്ഷിക്കാൻ പൊതുജനങ്ങൾ പരിസ്ഥിതി ചട്ടങ്ങളും മാർഗ്ഗനിർദ്ദേശങ്ങളും പൂർണ്ണമായി പാലിക്കണമെന്ന് മന്ത്രാലയം ശക്തമായി ആവശ്യപ്പെട്ടു. നിയമലംഘകർക്കെതിരെ കർശന നിയമനടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി.
