ദോഹ: കഴിഞ്ഞ ദിവസങ്ങളിൽ രേഖപ്പെടുത്തിയ ഉയർന്ന നിരക്കുകളിൽ നിന്നും അന്താരാഷ്ട്ര വിപണിയിൽ സ്വർണവിലയിൽ ഇടിവ്. ഡോളറിന്റെ മൂല്യം നേരിയ തോതിൽ ഉയർന്നതാണ് സ്വർണത്തിന് തിരിച്ചടിയായത്. എങ്കിലും യു.എസ് ഫെഡറൽ റിസർവ് പലിശനിരക്ക് ഉയർത്തിയേക്കില്ലെന്ന സൂചനകൾ സ്വർണവിലയിലെ വൻ ഇടിവ് തടഞ്ഞു നിർത്തി.
തിങ്കളാഴ്ചത്തെ സ്പോട്ട് വ്യാപാരത്തിൽ സ്വർണവില 0.5 ശതമാനം ഇടിഞ്ഞ് ഔൺസിന് 4,153.50 ഡോളർ എന്ന നിരക്കിലെത്തി. എന്നാൽ വ്യാപാരത്തിന്റെ തുടക്കത്തിൽ ജൂൺ 22-ന് ശേഷമുള്ള ഏറ്റവും ഉയർന്ന നിരക്ക് സ്വർണം രേഖപ്പെടുത്തിയിരുന്നു. അതേസമയം, ആഗസ്റ്റ് ഡെലിവറിക്കായുള്ള യു.എസ് സ്വർണ്ണ ഫ്യൂച്ചറുകൾ 1 ശതമാനം ഉയർന്ന് ഔൺസിന് 4,167.50 ഡോളറിലെത്തി.
പ്രതീക്ഷയേകി കഴിഞ്ഞ ആഴ്ച
യു.എസിലെ തൊഴിൽ ഡാറ്റ പ്രതീക്ഷിച്ചതിലും കുറഞ്ഞത് പണപ്പെരുപ്പത്തെക്കുറിച്ചും പലിശനിരക്ക് വർധനവിനെക്കുറിച്ചുമുള്ള ആശങ്കകൾക്ക് ആശ്വാസമായിരുന്നു. ഇതേത്തുടർന്ന് കഴിഞ്ഞ നാല് ആഴ്ചകളായുണ്ടായ തുടർച്ചയായ ഇടിവിന് വിരാമമിട്ട്, കഴിഞ്ഞ ആഴ്ചയിൽ മാത്രം സ്വർണവിലയിൽ 2 ശതമാനത്തിലധികം വർധനവ് രേഖപ്പെടുത്തിയിരുന്നതായി അൽ ജസീറയുടെ റിപ്പോർട്ടിൽ വ്യക്തമാക്കുന്നു.
