​ദോഹ: കായിക രംഗത്തെ സഹകരണത്തിലൂടെ ഖത്തറും കാനഡയും തമ്മിലുള്ള നയതന്ത്ര-സാംസ്കാരിക ബന്ധം കൂടുതൽ ആഴത്തിലാകുന്നു. 2026-ലെ ഖത്തർ-കാനഡ-മെക്സിക്കോ സാംസ്കാരിക വർഷത്തിന്റെ (Year of Culture) ഭാഗമായി ദോഹയിൽ ആരംഭിച്ച ശൈത്യകാല കായിക വികസന പരിപാടി ഇതിന്റെ പ്രധാന ചുവടുവെപ്പായി മാറി.
​കനേഡിയൻ സ്വത്വത്തിന്റെ അവിഭാജ്യ ഘടകമായ ശൈത്യകാല കായിക വിനോദങ്ങളെ ഖത്തറിലെ യുവതലമുറയ്ക്ക് പരിചയപ്പെടുത്തുക എന്നതാണ് ഈ പദ്ധതിയുടെ ലക്ഷ്യം. പരിപാടിയുടെ ഉദ്ഘാടനത്തോടനുബന്ധിച്ച് നടന്ന പ്രദർശന മത്സരങ്ങളിൽ കാനഡയിലെയും ഖത്തറിലെയും അമേച്വർ ടീമുകൾ പങ്കെടുത്തു. ഐസ് ഹോക്കി, സ്പീഡ് സ്കേറ്റിംഗ്, കേളിംഗ് (Curling) തുടങ്ങിയ വിനോദങ്ങളിൽ ഖത്തറിലെ കുട്ടികൾക്ക് പരിശീലനം നൽകുന്നതിനായുള്ള പ്രത്യേക സെഷനുകളും ഇതിന്റെ ഭാഗമായി ഒരുക്കിയിരുന്നു.കാനഡയുടെ ദേശീയ കായിക വിനോദമായ ഐസ് ഹോക്കി ഉൾപ്പെടെയുള്ളവ ഖത്തറിൽ പ്രചരിപ്പിക്കുന്നതിലൂടെ ഇരുരാജ്യങ്ങളിലെയും ജനങ്ങൾ തമ്മിലുള്ള ബന്ധം മെച്ചപ്പെടുത്താൻ സാധിക്കുമെന്ന് ഖത്തറിലെ കനേഡിയൻ അംബാസഡർ കരീം മോർക്കോസ് പറഞ്ഞു.ഖത്തറിൽ ശൈത്യകാല കായിക വിനോദങ്ങൾ വളർത്തിയെടുക്കുന്നതിന് കാനഡ സാങ്കേതിക സഹായവും പരിശീലനവും നൽകുന്നുണ്ട്. ഖത്തറിലെ കനേഡിയൻ കമ്മ്യൂണിറ്റിയും ഇതിൽ സജീവമായി പങ്കുചേരുന്നു.നൂറുകണക്കിന് കുട്ടികളാണ് പുതിയ കായിക വിനോദങ്ങൾ പഠിക്കുന്നതിനായി ഉദ്ഘാടന ചടങ്ങിൽ പങ്കെടുത്തത്.2010-ലെ വാൻകൂവർ വിന്റർ ഒളിമ്പിക്സിൽ നിന്നുള്ള പ്രചോദനം ഉൾക്കൊണ്ടാണ് ഖത്തറിൽ ഇത്തരം കായിക സൗകര്യങ്ങൾ വികസിപ്പിച്ചത് എന്നത് ഖത്തറും കാനഡയും തമ്മിലുള്ള ദീർഘകാല ബന്ധത്തിന്റെ തെളിവായി ചൂണ്ടിക്കാണിക്കപ്പെടുന്നു.
​അനിശ്ചിതത്വങ്ങൾ നിറഞ്ഞ ലോകസാഹചര്യത്തിൽ കായിക വിനോദങ്ങൾ മനുഷ്യരെ ഒന്നിപ്പിക്കുന്ന ശക്തിയായി പ്രവർത്തിക്കുന്നുവെന്നും, അടുത്ത 5-10 വർഷത്തിനുള്ളിൽ ഐസ് ഹോക്കി ഖത്തറിലെ കായിക സംസ്കാരത്തിന്റെ ഭാഗമാകുമെന്നും അംബാസഡർ ശുഭാപ്തിവിശ്വാസം പ്രകടിപ്പിച്ചു.