തിരുവനന്തപുരം: സംസ്ഥാന മന്ത്രിമാരിൽ ഏറ്റവും കൂടുതൽ കിലോമീറ്റർ ഓടിയ ഔദ്യോഗിക വാഹനം ഉപയോഗിക്കുന്നത് ഗതാഗതമന്ത്രി സി.പി. ജോൺ. മന്ത്രിക്ക് വാഹനം അനുവദിക്കുന്ന സമയത്തുതന്നെ കാർ 3,30,499 കിലോമീറ്റർ പിന്നിട്ടിരുന്നു. ടൂറിസം വകുപ്പ് വിവരാവകാശ നിയമപ്രകാരം നൽകിയ മറുപടിയിലാണ് ഇക്കാര്യം വ്യക്തമാക്കുന്നത്.
മറ്റ് ചില മന്ത്രിമാർക്കും ലക്ഷക്കണക്കിന് കിലോമീറ്റർ ഓടിയ വാഹനങ്ങളാണ് അനുവദിച്ചിരിക്കുന്നത്. അനൂപ് ജേക്കബ്, കെ.എം. ഷാജി, ഒ.ജെ. ജനീഷ് എന്നിവർക്ക് ലഭിച്ച കാറുകൾ രണ്ട് ലക്ഷം കിലോമീറ്ററിലധികം ഓടിയവയാണ്. സണ്ണി ജോസഫ്, മോൻസ് ജോസഫ്, എ.പി. അനിൽകുമാർ, എൻ. ഷംസുദ്ദീൻ, എം. ലിജു, പി.കെ. ബഷീർ, വി.ഇ. അബ്ദുൽ ഗഫൂർ, കെ.എ. തുളസി എന്നിവർക്ക് അനുവദിച്ച വാഹനങ്ങൾ ഒരു ലക്ഷം കിലോമീറ്ററിലധികം പിന്നിട്ടവയാണെന്നും മറുപടിയിൽ പറയുന്നു.
അതേസമയം, ഏറ്റവും കുറച്ച് കിലോമീറ്റർ ഓടിയ ഔദ്യോഗിക കാർ ഉപയോഗിക്കുന്നത് മുഖ്യമന്ത്രിയാണ്. വാഹനം അനുവദിച്ച സമയത്ത് വെറും 4,300 കിലോമീറ്റർ മാത്രമായിരുന്നു ഇതിന്റെ ഓട്ടം. എന്നാൽ 1.66 ലക്ഷം കിലോമീറ്റർ പിന്നിട്ട മറ്റൊരു കാറും മുഖ്യമന്ത്രിക്ക് നൽകിയിട്ടുണ്ട്.
ഓരോ മന്ത്രിക്കും ടൂറിസം വകുപ്പ് ഓരോ ഔദ്യോഗിക വാഹനം വീതമാണ് അനുവദിച്ചിരിക്കുന്നത്. ഇതിനു പുറമേ മുഖ്യമന്ത്രിയുടെ ഓഫീസിലേക്ക് അഞ്ച് കാറുകളും ടൂറിസം മന്ത്രിയുടെ ഓഫീസിലേക്ക് രണ്ട് കാറുകളും അധികമായി നൽകിയിട്ടുണ്ട്.
