​തിരുവനന്തപുരം: നിയമസഭാ തിരഞ്ഞെടുപ്പിന്റെ വോട്ടെണ്ണാൻ ദിവസങ്ങൾ ബാക്കിനിൽക്കെ, കേരളത്തിലെ കോൺഗ്രസിൽ മുഖ്യമന്ത്രി പദത്തെച്ചൊല്ലിയുള്ള ചർച്ചകൾ കൊഴുക്കുന്നു. 'പന്തളത്തു ചെന്നു കാതു പറിക്കാൻ ഇവിടുന്നേ ആട്ടിയാട്ടി പോണോ' എന്ന പഴഞ്ചൊല്ലിനെ അന്വർത്ഥമാക്കുന്ന രീതിയിലാണ് ഫലം വരും മുൻപേ നേതാക്കളും അനുയായികളും അവകാശവാദങ്ങളുമായി രംഗത്തെത്തിയിരിക്കുന്നത്. യു.ഡി.എഫ് തരംഗമുണ്ടാകുമെന്നും നൂറിലധികം സീറ്റുകൾ ലഭിക്കുമെന്നുമുള്ള ഉറച്ച വിശ്വാസത്തിലാണ് ഗ്രൂപ്പ് പോരുകളും സ്തുതിപാഠകരുടെ പടയൊരുക്കവും സജീവമാകുന്നത്.
​നേതാക്കളുടെ ബാഹുല്യം, മുഖ്യമന്ത്രി മോഹം
​മുൻ പ്രതിപക്ഷ നേതാവ് രമേശ് ചെന്നിത്തല, നിലവിലെ പ്രതിപക്ഷ നേതാവ് വി.ഡി. സതീശൻ എന്നിവരെ കേന്ദ്രീകരിച്ചു തുടങ്ങിയ ചർച്ചകൾ ഇപ്പോൾ എ.ഐ.സി.സി ജനറൽ സെക്രട്ടറി കെ.സി. വേണുഗോപാലിലേക്കും എത്തിനിൽക്കുന്നു. മൂവരും മുഖ്യമന്ത്രി പദത്തിന് യോഗ്യരാണെന്നതിൽ തർക്കമില്ലെങ്കിലും, ജനവിധി പുറത്തുവരുന്നതിന് മുൻപേയുള്ള ഈ 'അടവ് നയങ്ങൾ' ജനാധിപത്യ മര്യാദകളുടെ ലംഘനമാണെന്ന വിമർശനം ശക്തമാണ്.
​ദേശീയ പാതയിൽ പാർട്ടിയെ നയിക്കുന്ന കെ.സി. വേണുഗോപാലിനെപ്പോലൊരു നേതാവിനെ സംസ്ഥാന രാഷ്ട്രീയത്തിലെ മുഖ്യമന്ത്രി ചർച്ചകളിലേക്ക് വലിച്ചിഴയ്ക്കുന്നതിന് പിന്നിൽ ഹൈക്കമാൻഡിന്റെ താല്പര്യങ്ങളുണ്ടോ എന്ന ചോദ്യവും ഉയരുന്നുണ്ട്.
​ഇടതുപക്ഷത്തിന്റെ മിതത്വവും കോൺഗ്രസിന്റെ വിക്രിയകളും
ഭരണത്തുടർച്ചയുണ്ടാകുമെന്ന് പ്രതീക്ഷിക്കുമ്പോഴും ഇടതുപക്ഷം മുഖ്യമന്ത്രി ചർച്ചകളിലേക്കോ മന്ത്രിസഭാ രൂപീകരണത്തിലേക്കോ കടക്കാതെ സംയമനം പാലിക്കുകയാണ്. എന്നാൽ, കോൺഗ്രസിലാകട്ടെ അണികളേക്കാൾ കൂടുതൽ നേതാക്കളാണെന്ന അവസ്ഥയാണെന്നും കെ.പി.സി.സി ആസ്ഥാനത്ത് നേതാക്കളുടെ തിരക്ക് കാരണം ശ്വാസം മുട്ടുന്ന അവസ്ഥയാണെന്നും നിരീക്ഷകർ പരിഹസിക്കുന്നു. കുട്ടിക്കുരങ്ങന്മാരെ കൊണ്ട് ചൂടു പായസം കോയിക്കുന്നതുപോലെ, കിങ്കരന്മാരെ ഉപയോഗിച്ച് സ്വന്തം അപദാനങ്ങൾ പാടാൻ നേതാക്കൾ തന്നെ മുൻകൈ എടുക്കുന്ന കാഴ്ച കേരള രാഷ്ട്രീയത്തിന് പുതുമയാണ്.
​തിരുത്തൽ ശക്തിയാകുമോ ജനവിധി?
​കഴിഞ്ഞ സർക്കാരിന്റെ വീഴ്ചകളിൽ നിന്ന് വിളവെടുപ്പ് നടത്താമെന്ന കോൺഗ്രസിന്റെ ആത്മവിശ്വാസം ഉപതിരഞ്ഞെടുപ്പുകളിലെ വിജയങ്ങളിൽ നിന്ന് ഊർജ്ജം ഉൾക്കൊണ്ടതാണ്. എന്നാൽ, വോട്ടിംഗ് മെഷീനിൽ രേഖപ്പെടുത്തിയ വിധി ആർക്ക് അനുകൂലമാകുമെന്ന് കണ്ടറിയണം. ഇത്രയധികം കൊട്ടിഘോഷിച്ച് ചർച്ചകൾ നടത്തി ഒടുവിൽ ഫലം തിരിച്ചടിയായാൽ അത് വലിയ നിരാശയ്ക്ക് കാരണമാകും.
​"വാഴ്ത്തിപ്പാട്ടുകൾ തുടരട്ടെ, തിരഞ്ഞെടുപ്പ് ഫലം വരുംവരെയെങ്കിലും. ഫലം വരുമ്പോൾ ആരും നിരാശപ്പെടരുത്, കാരണം ഇനിയും തിരഞ്ഞെടുപ്പുകൾ വരും, അന്നുമുണ്ടാവും മുഖ്യമന്ത്രി കസേര അവിടെത്തന്നെ." -  ഓർമ്മിപ്പിക്കുന്നു.