ദോഹ:കൊടുംവേനലിൽ കുടുംബങ്ങൾക്കും കുട്ടികൾക്കും ഒരേപോലെ ആവേശവും വേറിട്ട വിനോദാനുഭവവും പകർന്ന് കത്താറ കൾച്ചറൽ വില്ലേജിലെ 'കളർവേർസ്' (ColorVerse) ഡിജിറ്റൽ ഇൻഡോർ അഡ്വഞ്ചർ സെന്റർ. അത്യാധുനിക ഡിജിറ്റൽ സാങ്കേതികവിദ്യയും കഥപറച്ചിലും ഒത്തുചേരുന്ന ഈ വിനോദകേന്ദ്രം ഖത്തറിലെ കുടുംബങ്ങൾക്കിടയിൽ വലിയ ജനപ്രീതിയാണ് നേടിയിരിക്കുന്നത്.
ജൂലൈ 16-ന് ആരംഭിച്ച ഈ പ്രദർശനം, 'കളറാമ' (Colorama) എന്ന സാങ്കൽപ്പിക ലോകത്തേക്ക് സന്ദർശകരെ കൂട്ടിക്കൊണ്ടുപോകുന്നു. വ്യത്യസ്ത തീമുകളിലായി ഒരുക്കിയിരിക്കുന്ന മേഖലകളിലൂടെ കടന്നുപോകുമ്പോൾ സന്ദർശകരും കഥയിലെ കഥാപാത്രങ്ങളായി മാറുന്ന തരത്തിലാണ് ഇതിന്റെ ഘടന.സാങ്കേതികവിദ്യയുടെയും ലൈറ്റിംഗിന്റെയും മനോഹരമായ കോമ്പിനേഷനാണ് കളർവേർസിനെ വേറിട്ടുനിർത്തുന്നത്. വേനൽച്ചൂടിൽ നിന്ന് മാറി, എയർ കണ്ടീഷൻ ചെയ്ത അത്യാധുനിക ഇൻഡോർ അന്തരീക്ഷത്തിൽ കുടുംബങ്ങൾക്ക് ഒന്നിച്ച് സമയം ചെലവഴിക്കാനും കായികമായ വെല്ലുവിളികളിൽ പങ്ക് ചേരാനും ഇവിടെ സൗകര്യമുണ്ട്.
"കുട്ടികൾക്ക് മാത്രമല്ല, മുതിർന്നവർക്കും ഒരുപോലെ ആസ്വദിക്കാൻ സാധിക്കുന്ന അപൂർവ്വ അനുഭവമാണിത്. പ്രൊജക്ഷനുകളും ലൈറ്റിംഗും കൊണ്ട് യഥാർത്ഥത്തിൽ വേറൊരു ലോകത്ത് എത്തിയതുപോലെ തോന്നും," കൂട്ടുകാരോടൊപ്പം പ്രദർശനം സന്ദർശിച്ച ദോഹ നിവാസിയായ റിച്ചാർഡ് പറഞ്ഞു.
'ഖത്തർ കലണ്ടറി'ന്റെ ഭാഗമായി സ്പേസ്ടൂണുമായി (Spacetoon) പങ്കാളിത്തത്തിലാണ് കളർവേർസ് വികസിപ്പിച്ചെടുത്തിരിക്കുന്നത്. ഖത്തറിലെ സമ്മർ ഇവന്റുകളിൽ കുടുംബങ്ങൾക്കായി ഒരുക്കിയിട്ടുള്ള ഏറ്റവും ആകർഷകമായ വിനോദകേന്ദ്രങ്ങളിലൊന്നായി ഇത് മാറിയിരിക്കുകയാണ്.
