വാഷിങ്ടൺ: ലോക രാജ്യങ്ങളിലെ ജനങ്ങളുടെ കാഴ്ചപ്പാടിൽ ചൈനയുടെ സ്വാധീനവും സ്വീകാര്യതയും വർധിക്കുന്നതായി പ്യൂ റിസർച്ച് സെന്ററിന്റെ ഏറ്റവും പുതിയ സർവേ റിപ്പോർട്ട്. 2002 മുതൽ നടത്തുന്ന ഈ പഠനത്തിന്റെ ചരിത്രത്തിൽ ആദ്യമായാണ് ആഗോള ജനപ്രീതിയുടെ കാര്യത്തിൽ ചൈന അമേരിക്കയെ പിന്നിലാക്കുന്നത്.

2026-ന്റെ തുടക്കത്തിൽ 36 രാജ്യങ്ങളിലായി 42,151 മുതിർന്നവരിൽ നടത്തിയ സർവേയിൽ, 25 രാജ്യങ്ങളിലെ ജനങ്ങൾ അമേരിക്കയെക്കാൾ ചൈനയോടാണ് കൂടുതൽ അനുകൂല നിലപാട് പ്രകടിപ്പിച്ചത്. ലോക രാഷ്ട്രീയത്തിലെ ശക്തികേന്ദ്രങ്ങളെക്കുറിച്ചുള്ള പൊതുജനാഭിപ്രായം വിലയിരുത്തുന്ന പഠനമാണിത്.

ലോകകാര്യങ്ങളിൽ വിവേകപൂർവമായ തീരുമാനങ്ങൾ എടുക്കുന്ന നേതാവെന്ന നിലയിൽ അമേരിക്കൻ പ്രസിഡന്റ് ഡൊണാൾഡ് ട്രംപിനേക്കാൾ ചൈനീസ് പ്രസിഡന്റ് ഷി ജിൻപിങ്ങിലാണ് കൂടുതൽ പേർ വിശ്വാസം പ്രകടിപ്പിച്ചത്. സർവേയിൽ ഉൾപ്പെട്ട 22 രാജ്യങ്ങളിൽ ഷിക്കാണ് മുൻതൂക്കം ലഭിച്ചത്. പാകിസ്താനിലാണ് ഷി ജിൻപിങ്ങിന് ഏറ്റവും ഉയർന്ന ജനവിശ്വാസം രേഖപ്പെടുത്തിയത്.

അതേസമയം, ഇന്ത്യ, പോളണ്ട്, ഫിലിപ്പീൻസ്, ദക്ഷിണ കൊറിയ, ജപ്പാൻ, ഇസ്രായേൽ എന്നീ ആറ് രാജ്യങ്ങളിൽ മാത്രമാണ് അമേരിക്കയ്ക്ക് ചൈനയെക്കാൾ കൂടുതൽ അനുകൂല അഭിപ്രായം ലഭിച്ചത്.

മറ്റ് രാജ്യങ്ങളുടെ ആഭ്യന്തര കാര്യങ്ങളിൽ അമേരിക്ക അമിതമായി ഇടപെടുന്നുവെന്നാണ് സർവേയിൽ പങ്കെടുത്തവരിൽ 75 ശതമാനം പേരും അഭിപ്രായപ്പെട്ടത്. ചൈനയെ സംബന്ധിച്ച് ഇതേ അഭിപ്രായം പങ്കുവെച്ചത് 45 ശതമാനം പേർ മാത്രമാണ്.

പൗരന്മാരുടെ വ്യക്തിസ്വാതന്ത്ര്യത്തെ മാനിക്കുന്നതിൽ അമേരിക്ക ഇപ്പോഴും ചൈനയെക്കാൾ മുന്നിലാണെങ്കിലും, ഈ മേഖലയിൽ ഇരുരാജ്യങ്ങളും തമ്മിലുള്ള അന്തരം കഴിഞ്ഞ അഞ്ച് വർഷത്തിനിടെ ഗണ്യമായി കുറഞ്ഞതായി റിപ്പോർട്ട് വ്യക്തമാക്കുന്നു.

അമേരിക്കയുടെ അയൽരാജ്യങ്ങളായ കാനഡയിലും മെക്സിക്കോയിലും പോലും ചൈനയോടുള്ള അനുകൂല സമീപനം വർധിച്ചതായി സർവേ ചൂണ്ടിക്കാട്ടുന്നു. പ്രത്യേകിച്ച് വികസ്വര രാജ്യങ്ങളിലും ഏഷ്യ-പസഫിക് മേഖലയിലുമാണ് ചൈനയ്ക്ക് കൂടുതൽ സ്വീകാര്യത ലഭിച്ചിരിക്കുന്നത്.

അമേരിക്കയുടെ വിദേശനയത്തിലെ അനിശ്ചിതത്വവും സൈനിക ശക്തിയുടെ ആവർത്തിച്ചുള്ള ഉപയോഗവും പല രാജ്യങ്ങളെയും ആശങ്കപ്പെടുത്തുന്ന ഘടകങ്ങളാണെന്ന് റിപ്പോർട്ട് വിലയിരുത്തുന്നു. മധ്യവരുമാന രാജ്യങ്ങളിലാണ് ചൈനയ്ക്ക് ഏറ്റവും കൂടുതൽ പിന്തുണ ലഭിക്കുന്നത്. ഉയർന്ന വരുമാനമുള്ള രാജ്യങ്ങൾ പൊതുവെ ചൈനയെ പ്രതികൂലമായി കാണുന്നുണ്ടെങ്കിലും, സിംഗപ്പൂർ ഈ പ്രവണതയ്ക്ക് അപവാദമായി ചൈനയ്ക്ക് ശക്തമായ പിന്തുണ നൽകുന്ന രാജ്യമായി തുടരുന്നതായും പ്യൂ റിസർച്ച് സെന്ററിന്റെ സർവേ വ്യക്തമാക്കുന്നു.