"അന്ത്യോദയ, അന്നയോജന കാർഡുകൾ റദ്ദാക്കാനോ തുടരാതിരിക്കാനോ സാദ്ധ്യതയുണ്ടോ എന്ന ചോദ്യം കേരള വിരുദ്ധ നിലപാട്" - പിണറായി വിജയൻ
തിരുവനന്തപുരം: കേരളത്തിലെ യു.ഡി.എഫ് എം.പിമാരുടെ പ്രവർത്തനത്തെക്കുറിച്ച് സംവാദത്തിന് തയ്യാറെന്ന് മുഖ്യമന്ത്രി പിണറായി വിജയൻ. ഇതിന് മറുപടിയായി യു.ഡി.എഫ് എം.പിമാരുടെ പാർലമെന്റിലെ നിലപാട് കേരള താത്പര്യങ്ങൾ സംരക്ഷിക്കാനാണെന്ന് കെ.സി. വേണുഗോപാൽ എം.പി.
'മീറ്റ് ദി ലീഡർ' പരിപാടിയിലായിരുന്നു മുഖ്യമന്ത്രിയുടെ പ്രതികരണം. അതിദാരിദ്ര്യ നിർമ്മാർജ്ജനം പ്രഖ്യാപിച്ച കേരളത്തിൽ, അന്ത്യോദയ, അന്നയോജന കാർഡുകൾ റദ്ദാക്കാനോ തുടരാതിരിക്കാനോ സാദ്ധ്യതയുണ്ടോ എന്ന് കൊല്ലം, കോഴിക്കോട് എം.പിമാർ പാർലമെന്റിൽ ചോദ്യം ചെയ്ത നടപടിയെ മുഖ്യമന്ത്രി രൂക്ഷമായി വിമർശിച്ചു.
"വസ്തുതയുമായി ബന്ധമില്ലാത്ത ചോദ്യം ചോദിച്ച് തെറ്റായ ചിത്രം ഉയർത്തിക്കാട്ടാനാണ് ശ്രമിച്ചത്. ഈ നിലപാട് കേരള വിരുദ്ധമാണ്," മുഖ്യമന്ത്രി പറഞ്ഞു. ഇത്തരം നിലപാടുകൾക്ക് കെ.സി. വേണുഗോപാലിനെ പോലുള്ളവരിൽ നിന്ന് മറുപടിയാണ് പ്രതീക്ഷിക്കുന്നതെന്നും അല്ലാതെ സംവാദത്തിനുള്ള വെല്ലുവിളിയല്ലെന്നും അദ്ദേഹം കൂട്ടിച്ചേർത്തു.
മറുപടിയുമായി രംഗത്തെത്തിയ കെ.സി. വേണുഗോപാൽ, മുഖ്യമന്ത്രിയുടെ വെല്ലുവിളി സന്തോഷത്തോടെ സ്വീകരിക്കുന്നതായി അറിയിച്ചു. സ്ഥലവും സമയവും മുഖ്യമന്ത്രിക്ക് തീരുമാനിക്കാമെന്നും അദ്ദേഹം വ്യക്തമാക്കി. യു.ഡി.എഫ് എം.പിമാർ കേരള താത്പര്യങ്ങൾ സംരക്ഷിക്കാനാണ് പാർലമെന്റിൽ പോരാടിയതെന്നും അദ്ദേഹം പ്രതികരിച്ചു.
