ദോഹ: ഖത്തറിലെ സ്വാഭാവിക പരിസ്ഥിതി വ്യവസ്ഥ സംരക്ഷിക്കുന്നതിന്റെ ഭാഗമായി 57 പ്രാദേശിക ജീവികളെയും ദേശാടന പക്ഷികളെയും അവയുടെ സ്വാഭാവിക വാസസ്ഥലങ്ങളിലേക്ക് തിരികെ തുറന്നുവിട്ടതായി പരിസ്ഥിതി, കാലാവസ്ഥാ വ്യതിയാന മന്ത്രാലയം അറിയിച്ചു.
2025 ജനുവരി മുതൽ 2026 ഓഗസ്റ്റ് അവസാന വാരം വരെയുള്ള കാലയളവിൽ രാജ്യത്തിന്റെ വിവിധ ഭാഗങ്ങളിൽ നിന്നായി 275 വന്യജീവികളെയാണ് മന്ത്രാലയം രക്ഷപ്പെടുത്തിയത്. ഇതിൽ ആവശ്യമായ പരിചരണവും ചികിത്സയും പുനരധിവാസവും പൂർത്തിയാക്കിയ ശേഷം അതിജീവന ശേഷി കൈവരിച്ച 57 ജീവികളെയാണ് കാടുകളിലേക്കും മറ്റ് സ്വാഭാവിക വാസസ്ഥലങ്ങളിലേക്കും തുറന്നുവിട്ടത്. ശേഷിക്കുന്ന 218 ജീവികൾക്ക് അനുയോജ്യമായ കേന്ദ്രങ്ങളിൽ സുരക്ഷിതമായ പരിചരണവും സംരക്ഷണവും നൽകിവരുന്നുണ്ട്.
40 ഗ്രേ ഹെറോണുകൾ (ചാര മുണ്ടി), 2 മുള്ളൻപന്നികൾ (Hedgehogs), 7 മുള്ളൻവാലൻ പല്ലികൾ (Spiny-tailed lizards), 7 കടലാമകൾ, ഒരു ഈജിപ്ഷ്യൻ നൈറ്റ്ജാർ പക്ഷി എന്നിവയാണ് തിരികെ പ്രകൃതിയിലേക്ക് മടങ്ങിയവയിൽ ഉൾപ്പെടുന്നത്.
പൊതുജനങ്ങളിൽ നിന്നും ബന്ധപ്പെട്ട മറ്റ് സ്ഥാപനങ്ങളിൽ നിന്നും ലഭിക്കുന്ന വിവരങ്ങളുടെ അടിസ്ഥാനത്തിലാണ് ഫീൽഡ് ടീമുകൾ അതിവേഗം സ്ഥലത്തെത്തി ജീവികളെ സുരക്ഷിതമായി മാറ്റുന്നത്. തുടർന്ന് വിദഗ്ധ പരിശോധനകളും ചികിത്സയും നൽകി ആരോഗ്യനില ഉറപ്പുവരുത്തിയ ശേഷമാണ് സ്വാഭാവിക അന്തരീക്ഷത്തിലേക്ക് തിരികെ വിടുന്നതെന്ന് മന്ത്രാലയം വ്യക്തമാക്കി.
