ദോഹ: ഹോർമുസ് കടലിടുക്കിലൂടെയുള്ള യാത്രയ്ക്കിടയിൽ ഖത്തർ ഗ്യാസ് ട്രാൻസ്പോർട്ട് കമ്പനിയുടെ (നകിലാത്) എൽ.എൻ.ജി (LNG) വാഹക കപ്പലായ 'അൽ റെക്കയ്യാത്ത്' (Al Rekayyat) ആക്രമിക്കപ്പെട്ടതായി കമ്പനി സ്ഥിരീകരിച്ചു. ചൊവ്വാഴ്ചയായിരുന്നു സംഭവം. കപ്പലിന് നേരെ ഒരു പ്രൊജക്റ്റൈൽ (projectile) വന്ന് പതിക്കുകയായിരുന്നുവെന്ന് അധികൃതർ അറിയിച്ചു.
ആക്രമണത്തിൽ കപ്പലിലെ ജീവനക്കാർക്കാർക്കും തന്നെ പരിക്കേറ്റിട്ടില്ല. കപ്പലിന് കേടുപാടുകൾ സംഭവിച്ചിട്ടുണ്ടെങ്കിലും ഇന്ധനച്ചോർച്ചയോ മറ്റ് പരിസ്ഥിതി ആഘാതങ്ങളോ ഉണ്ടായിട്ടില്ലെന്നും നകിലാത് പ്രസ്താവനയിലൂടെ വ്യക്തമാക്കി.
സംഭവത്തിന് പിന്നാലെ കപ്പലുമായും അതിലെ ജീവനക്കാരുമായും കമ്പനി നിരന്തരം സമ്പർക്കം പുലർത്തുന്നുണ്ട്. നിലവിലെ സാഹചര്യം വളരെ സൂക്ഷ്മമായി നിരീക്ഷിച്ചു വരികയാണെന്നും അധികൃതർ കൂട്ടിച്ചേർത്തു.
"ഞങ്ങളുടെ ജീവനക്കാരുടെ സുരക്ഷ, പരിസ്ഥിതി സംരക്ഷണം, കപ്പലുകളുടെ സുരക്ഷിതത്വം എന്നിവയ്ക്കാണ് നകിലാത് എപ്പോഴും പ്രഥമ പരിഗണന നൽകുന്നത്," കമ്പനി ഔദ്യോഗിക പ്രസ്താവനയിൽ വ്യക്തമാക്കി.
