ചെങ്ങന്നൂർ: പൂലിയൂരിൽ കേബിൾ ലൈൻ പുനഃസ്ഥാപിക്കുന്നതിനിടെ ഷോക്കേറ്റ് ഏഷ്യാനെറ്റ് കേബിൾ ടിവിയുടെ കരാർ ജീവനക്കാരൻ മരണമടഞ്ഞു.
ഈസ്റ്റ് ഓതറ തൈക്കാട്ട് പടിഞ്ഞാറേതിൽ ജനിൽ കുമാർ (47) ആണ് മരണമടഞ്ഞത്.
ചൊവ്വാഴ്ച വൈകിട്ട് 6.30 ഓടെ പൂലിയൂർ ബ്ലോക്ക് പടിക്ക് സമീപമായിരുന്നു അപകടം. ഈ ഭാഗത്ത് പഴയ വൈദ്യുത പോസ്റ്റ് മാറ്റി പുതിയത് സ്ഥാപിച്ചതിനെ തുടർന്ന് ലൈൻ ചാർജ് ചെയ്തിരുന്നു. ഇതിന് പിന്നാലെയാണ് കേബിൾ കണക്ഷൻ പുനഃസ്ഥാപിക്കാനായി ജനിൽകുമാറും സഹപ്രവർത്തകരും സ്ഥലത്തെത്തിയത്.
പോസ്റ്റിൽ ഏണി ചാരിവെച്ച് കേബിൾ കെട്ടുന്നതിനിടെ ജനിൽകുമാറിന്റെ കാല് തെന്നി. വീഴാൻ പോയപ്പോൾ പിടിത്തം കിട്ടാനായി പോസ്റ്റിലെ തെരുവ് വിളക്ക് ഘടിപ്പിക്കുന്ന യു-ക്ലാമ്പിൽ പിടിച്ചതോടെ ശക്തമായ ഷോക്കേറ്റ് താഴേക്ക് തെറിച്ചു വീഴുകയായിരുന്നു. കൂടെയുണ്ടായിരുന്ന സഹപ്രവർത്തകർ ഉടൻ തന്നെ
പ്രഥമശുശ്രൂഷ ലഭ്യമാക്കി ആശുപത്രിയിൽ എത്തിക്കുകയും ചെയ്തെങ്കിലും ജീവൻ രക്ഷിക്കാനായില്ല.പി.ടിജയശ്രി യാണ് ഭാര്യ.
വിസ്മയ , ആരത്രിക എന്നിവർ മക്കളാണ്.
സംസ്‌കാരം വ്യാഴാഴ്ച
വൈകിട്ട്
മൂന്നിന് വീട്ടുവളപ്പിൽ നടക്കും.
