ദോഹ:നവംബർ–ഡിസംബർ മാസങ്ങളിലായി ഖത്തർ ആതിഥേയത്വം വഹിക്കുന്ന FIFA അണ്ടർ–17 ലോകകപ്പിനും FIFA അറബ് കപ്പിനും ടിക്കറ്റ് വിൽപ്പന ആരംഭിക്കുന്നതായി സംഘാടകർ അറിയിച്ചു.
FIFA അറബ് കപ്പ്:
ടിക്കറ്റ് വിൽപ്പന സെപ്റ്റംബർ 30ന് ഉച്ചയ്ക്ക് 3 മുതൽ ആരംഭിക്കും. മൂന്ന് വിഭാഗങ്ങളിലായാണ് ടിക്കറ്റുകൾ ലഭ്യമാകുക. 25 റിയാൽ മുതലാണ് നിരക്ക്. ഡിസംബർ 1 മുതൽ 18 വരെ ആറ് ലോകകപ്പ് വേദികളിലാണ് മത്സരങ്ങൾ നടക്കുക. കായിക ആരാധകർക്കായി എല്ലാ വേദികളിലും ഫാൻ സോണുകൾ ഒരുക്കും. ഫൈനൽ മത്സരം ഖത്തർ ദേശീയ ദിനമായ ഡിസംബർ 18ന് വൈകിട്ട് 7 മണിക്ക് ലുസൈൽ സ്റ്റേഡിയത്തിൽ അരങ്ങേറും.
FIFA അണ്ടർ–17 ലോകകപ്പ്:
ടിക്കറ്റുകൾ ഒക്ടോബർ 2ന് വൈകിട്ട് 3 മുതൽ Visa കാർഡ് ഉടമകൾക്കായി പ്രത്യേകമായി ലഭ്യമാക്കും. 20 റിയാൽ മുതലാണ് നിരക്ക്. ഡേ പാസ് ഓപ്ഷനുകൾ വഴി ഒരേ ദിവസം ഒന്നിലധികം മത്സരങ്ങളും അനുബന്ധ വിനോദ പരിപാടികളും ആസ്വദിക്കാം. പ്രൈം മാച്ച് പാസ് മുഖേന പ്രധാന മത്സരങ്ങൾക്ക് മുൻകൂട്ടി സീറ്റുകൾ ഉറപ്പാക്കാനുമാകും. ആകെ 104 മത്സരങ്ങളിലായി ഒരു ദിവസം വരെ 8 മത്സരങ്ങൾ നടക്കും. നവംബർ 3 മുതൽ 27 വരെ ദോഹയിലെ ആസ്പയർ സോൺ സ്റ്റേഡിയങ്ങൾ വേദിയാകും. ഫൈനൽ നവംബർ 27ന് വൈകിട്ട് 7 മണിക്ക് ഖലീഫ ഇന്റർനാഷണൽ സ്റ്റേഡിയത്തിൽ നടക്കും.
കഴിഞ്ഞ ദിവസം ഇരു ടൂർണമെന്റുകളുടെയും സ്പോൺസർമാരെയും പ്രഖ്യാപിച്ചിരുന്നു. ഖത്തർ എയർവേസ്, വിസിറ്റ് ഖത്തർ എന്നിവ ഉൾപ്പെടെ ഏഴ് പ്രധാന സ്പോൺസർമാരാണ് പ്രഖ്യാപിച്ചത്. കൂടാതെ FIFA ഇന്റർകോണ്ടിനെന്റൽ കപ്പ് മത്സരങ്ങൾ ഡിസംബർ 10, 13, 17 തീയതികളിലായി ഖത്തറിൽ അരങ്ങേറും.
