തിരുവനന്തപുരം: യൂത്ത് കോൺഗ്രസ് മുൻ സംസ്ഥാന പ്രസിഡന്റും എം.എൽ.എയുമായ രാഹുൽ മാങ്കൂട്ടത്തിനെതിരെ ജീവപര്യന്തം തടവു കിട്ടാവുന്ന ബലാത്സംഗം ഉൾപ്പെടെയുള്ള ഗുരുതര കുറ്റങ്ങൾ ചുമത്തി കേസ്. പിന്നാലെ, ഉഭയസമ്മതപ്രകാരമുള്ള ബന്ധമാണെന്നും പരാതിക്ക് പിന്നിൽ സി.പി.എം-ബി.ജെ.പി രാഷ്ട്രീയ ഗൂഢാലോചനയാണെന്നും ആരോപിച്ച് രാഹുൽ മാങ്കൂട്ടത്തിൽ പ്രിൻസിപ്പൽ ജില്ലാ സെഷൻസ് കോടതിയിൽ മുൻകൂർ ജാമ്യാപേക്ഷ നൽകി. കേസിന്റെ ഭാവിയിൽ കോടതിയുടെ നിലപാട് നിർണായകമാകും.
​ജാമ്യാപേക്ഷ തിങ്കളാഴ്ച കോടതി പരിഗണിച്ചേക്കും. രാഹുൽ നിലവിൽ ഒളിവിലാണെന്നും സംസ്ഥാനം വിട്ടതായാണ് സൂചനയെന്നും പോലീസ് അറിയിച്ചു.

​ എഫ്.ഐ.ആറിൽ ക്രൂരപീഡനത്തിന്റെ വിശദാംശങ്ങൾ
‌
​റൂറൽ എസ്.പി കെ.എസ്.സുദർശനന്റെ നേതൃത്വത്തിൽ യുവതിയുടെ അഞ്ചര മണിക്കൂർ മൊഴിയെടുത്തതിന് ശേഷമാണ് ഭാരതീയ ന്യായസംഹിതയിലെയും (ബി.എൻ.എസ്) ഐ.ടി ആക്ടിലെയും ജാമ്യമില്ലാ വകുപ്പുകൾ ചുമത്തി വലിയമല പോലീസ് കേസെടുത്തത്. ബലാത്സംഗം നടന്നത് നേമം സ്റ്റേഷൻ പരിധിയിലായതിനാൽ എഫ്.ഐ.ആർ ഉൾപ്പെടെയുള്ള രേഖകൾ അവിടേക്ക് കൈമാറി.

​എഫ്.ഐ.ആർ പ്രകാരം പീഡനം നടന്ന സംഭവങ്ങൾ:

​2025 മാർച്ച് 4: തൃക്കണ്ണാപുരത്തെ ഫ്ലാറ്റിൽ വെച്ച് പീഡനം.
​മാർച്ച് 17: ഭീഷണിപ്പെടുത്തി നഗ്ന വീഡിയോ പകർത്തി. ജീവിതം നശിപ്പിക്കുമെന്ന് ഭീഷണിപ്പെടുത്തി.
​ഏപ്രിൽ 22: ഗർഭിണിയായ ശേഷം ഫ്ലാറ്റിൽ വെച്ച് വീണ്ടും പീഡനം.
​മേയ് അവസാന ആഴ്ച: രാഹുലിന്റെ പാലക്കാട്ടുള്ള ഫ്ലാറ്റിൽ വെച്ച് രണ്ട് ദിവസങ്ങളിലായി പീഡിപ്പിച്ചു.
​ഗർഭച്ഛിദ്രം: രാഹുൽ നിർബന്ധിപ്പിച്ച് ഗുളികകൾ കഴിപ്പിച്ച് ഗർഭച്ഛിദ്രം നടത്തി. ഗർഭച്ഛിദ്രത്തിന് മരുന്ന് എത്തിച്ച സുഹൃത്ത് ജോബി ജോസഫ് കേസിൽ രണ്ടാം പ്രതിയാണ്.

​ജീവപര്യന്തം വരെ ലഭിക്കാവുന്ന കുറ്റങ്ങൾ

​കേസിൽ ചുമത്തിയിട്ടുള്ള പ്രധാന വകുപ്പുകൾ ഇവയാണ്:കുറ്റകൃത്യം വകുപ്പ് ശിക്ഷ
വിശ്വാസം മുതലെടുത്തുള്ള തുടർച്ചയായ ബലാത്സംഗം ബി.എൻ.എസ്- 64(2)(എഫ്) 10 വർഷം മുതൽ ജീവപര്യന്തം വരെ തടവ്
ഗർഭിണിയാണെന്നറിഞ്ഞിട്ടും ബലാത്സംഗം ബി.എൻ.എസ്- 64(2)(എച്ച്) ജീവപര്യന്തം വരെ തടവ്
നിർബന്ധിച്ചുള്ള ഗർഭഛിദ്രം ബി.എൻ.എസ്- 89, പത്ത് വർഷം തടവ് അല്ലെങ്കിൽ ജീവപര്യന്തം
സ്വകാര്യ ദൃശ്യങ്ങൾ പ്രചരിപ്പിക്കുമെന്ന് ഭീഷണി ഐ.ടി. ആക്ട് 66(ഇ) 3 വർഷം തടവും 2 ലക്ഷം രൂപ പിഴയും രാഹുലിന്റെ വാദങ്ങൾ
​മുൻകൂർ ജാമ്യാപേക്ഷയിൽ രാഹുൽ മാങ്കൂട്ടത്തിൽ ഉന്നയിക്കുന്ന പ്രധാന വാദങ്ങൾ:
​ഗർഭത്തിന് ഉത്തരവാദി ഭർത്താവ്: ഗർഭത്തിന് യുവതിയുടെ ഭർത്താവാണ് ഉത്തരവാദിയെന്നും ഗർഭച്ഛിദ്രം യുവതിയുടെ ഇഷ്ടപ്രകാരമായിരുന്നുവെന്നും ഹർജിയിൽ പറയുന്നു.

​ഗൂഢാലോചന: യുവതിയുടെ ഭർത്താവ് ബി.ജെ.പി നേതാവാണ്. പരാതിക്ക് പിന്നിൽ സി.പി.എം, ബി.ജെ.പി എന്നിവരുടെ രാഷ്ട്രീയ ഗൂഢാലോചനയുണ്ട്.
​ദുരൂഹത: തിരഞ്ഞെടുപ്പ് സമയത്ത് മുഖ്യമന്ത്രിക്ക് നേരിട്ട് പരാതി നൽകിയതിൽ ദുരൂഹതയുണ്ട്.

​നെയ്യാറ്റിൻകര മജിസ്‌ട്രേറ്റ് കോടതി യുവതിയുടെ രഹസ്യമൊഴി രേഖപ്പെടുത്തി. രാഹുൽ രാജ്യം വിടാതിരിക്കാൻ ഇമിഗ്രേഷൻ ബ്യൂറോയ്ക്ക് പോലീസ് വിവരം കൈമാറിയിട്ടുണ്ട്. കേസ് അന്വേഷണത്തിനായി സിറ്റി പോലീസ് ഡെപ്യൂട്ടി കമ്മീഷണർ ദീപക് ധൻകറിന്റെ മേൽനോട്ടത്തിൽ പ്രത്യേക സംഘം രൂപീകരിച്ചു.