ദോഹ : സ്വപ്നങ്ങളിൽ എവിടെയും 'നഴ്സിംഗ്' എന്നൊരു കരിയർ ഉണ്ടായിരുന്നില്ല. എന്നാൽ ആശുപത്രി കിടക്കയിൽ വെച്ചുണ്ടായ ഒരു ആരോഗ്യപരമായ അനുഭവം ആ പെൺകുട്ടിയുടെ ജീവിതത്തിന്റെ ദിശ തന്നെ മാറ്റിമറിച്ചു. തന്നെ പരിചരിച്ച നഴ്സിന്റെ കാരുണ്യവും പ്രത്യാശയും നിറഞ്ഞ ഇടപെടൽ അവളുടെ മനസ്സിൽ ഒരു വലിയ മനുഷ്യത്വത്തിന്റെ മുദ്രപതിപ്പിച്ചു. ആ ഒരു നിമിഷമാണ് ഖത്തറിന്റെ ആരോഗ്യരംഗത്ത് ഒരു പുതിയ ചരിത്രം കുറിക്കാൻ ഡോ. നബീല അൽ മീറിന് വഴിവിളക്കായത്.
​ഖത്തർ യൂണിവേഴ്സിറ്റിയിലെ കോളേജ് ഓഫ് നഴ്സിംഗിന്റെ സ്ഥാപക ഡീൻ കൂടിയായ ഡോ. നബീല അബ്ദുള്ള അൽ മീർ തന്റെ ഭൂതകാലം ഓർത്തെടുക്കുന്നത് ഇങ്ങനെയാണ്:
​"ചെറുപ്പത്തിൽ ഒരു രോഗബാധയെത്തുടർന്ന് എനിക്ക് ദിവസങ്ങളോളം ആശുപത്രിയിൽ കഴിയേണ്ടി വന്നു. അന്ന് എന്നെ പരിചരിച്ച നഴ്സ് മരുന്ന് തരുന്നതിൽ മാത്രമല്ല, എന്നെ ആശ്വസിപ്പിക്കുന്നതിലും കാണിച്ച സ്നേഹവും ശ്രദ്ധയും എന്നിൽ വലിയൊരു സ്വാധീനം ചെലുത്തി. ആ നന്മയാണ് എന്നെ ഈ പവിത്രമായ തൊഴിലിലേക്ക് എത്തിച്ചത്."
​ഹമദ് മെഡിക്കൽ കോർപ്പറേഷനിൽ നിന്നാണ് അൽ മീർ തന്റെ പഠനവും ഔദ്യോഗിക ജീവിതവും ആരംഭിച്ചത്. തുടർന്ന് ഉന്നതവിദ്യാഭ്യാസത്തിനായി വിദേശത്തേക്ക് പോയ അവർ നഴ്സിംഗിൽ ബാച്ചിലേഴ്സ്, മാസ്റ്റേഴ്സ് ബിരുദങ്ങൾ കരസ്ഥമാക്കി. തുടർന്ന് കഠിനപ്രയത്നത്തിലൂടെ 1998-ൽ നഴ്സിംഗ് മാനേജ്മെന്റിലും എജ്യുക്കേഷനിലും ഡോക്ടറേറ്റ് (PhD) നേടി. നഴ്സിംഗിൽ ഡോക്ടറേറ്റ് നേടുന്ന ആദ്യ ഖത്തറി വനിത എന്ന ചരിത്രനേട്ടവും ഇതോടെ അവർ സ്വന്തമാക്കി.
​"വിദ്യാഭ്യാസമാണ് ഏറ്റവും വലിയ ആയുധമെന്നും, അതിലൂടെ മാത്രമേ ഖത്തറിലെ നഴ്സിംഗ് മേഖലയെ കൂടുതൽ ഉയരങ്ങളിലേക്ക് നയിക്കാൻ കഴിയൂ എന്നും ഞാൻ ഉറച്ചു വിശ്വസിച്ചിരുന്നു," തന്റെ കരിയറിലെ വെല്ലുവിളികളെയും ലക്ഷ്യങ്ങളെയും കുറിച്ച് ഡോ. നബീല വ്യക്തമാക്കുന്നു.രാജ്യത്തെ ആരോഗ്യസംരക്ഷണ മേഖലയുടെ നിലവാരം ഉയർത്തുന്നതിനായി ഖത്തർ സർക്കാർ വലിയ പിന്തുണയാണ് നഴ്സിംഗ് മേഖലയ്ക്ക് നൽകി വരുന്നത്. ഇതിന്റെ ഏറ്റവും വലിയ ഉദാഹരണമാണ് ഖത്തർ യൂണിവേഴ്സിറ്റിയിൽ 'കോളേജ് ഓഫ് നഴ്സിംഗ്' സ്ഥാപിതമായത്. ഇത് സമൂഹത്തെ സേവിക്കാൻ പ്രാപ്തരായ മികച്ച സ്വദേശി നഴ്സിംഗ് പ്രൊഫഷണലുകളെ വാർത്തെടുക്കാൻ ഏറെ സഹായകരമായിട്ടുണ്ട്.
​സുസ്ഥിര വികസനത്തിന്റെ കേന്ദ്രബിന്ദു മനുഷ്യന്റെ ആരോഗ്യമാണ് എന്ന തിരിച്ചറിവോടെ, ഖത്തറിലെ ആരോഗ്യസംരക്ഷണ സംവിധാനങ്ങൾക്ക് ശക്തമായ പിന്തുണയേകി അതിവേഗത്തിലുള്ള വളർച്ചയാണ് ഇന്ന് നഴ്സിംഗ് മേഖല കൈവരിച്ചുകൊണ്ടിരിക്കുന്നത്. പുതിയ തലമുറയ്ക്ക് വലിയൊരു പ്രചോദനമാണ് ഡോ. നബീല അൽ മീറിന്റെ ഈ ജീവിതയാത്ര.