​ദോഹ:പ്രവാസലോകത്തെ വിവിധ മേഖലകളിൽ വ്യക്തിമുദ്ര പതിപ്പിച്ച മുപ്പതിലധികം അമ്മമാരെയും വനിതകളെയും ഒരുമിപ്പിച്ചു കൊണ്ട് 'ഷി സ്പീക്ക്സ്: ടെൽ ഓൾ' (She Speaks: Tell All) സംഗമം ദോഹയിൽ നടന്നു. ദോഹ വിമൻ ഫോറവും ഗോൾഡൻ സി.എം.സി ഈവന്റ്സ് ആന്റ് മാനേജ്‌മെന്റും സംയുക്തമായി 'മദേഴ്‌സ് മന്ത്' ആഘോഷങ്ങളുടെ ഭാഗമായാണ് പാർക്ക് ഹയാത്ത് ദോഹയിൽ ഈ പരിപാടി സംഘടിപ്പിച്ചത്.
​വനിതകളുടെ ശാക്തീകരണവും പരസ്പര പിന്തുണയും ലക്ഷ്യമിട്ട് നടത്തുന്ന ഈ കൂട്ടായ്മ, മാതൃത്വം, സ്വത്വബോധം, നേതൃപാടവം, കുടുംബജീവിതം, വ്യക്തിഗത വളർച്ച എന്നിവയെക്കുറിച്ചുള്ള തുറന്ന ചർച്ചകൾക്ക് വേദിയൊരുക്കി. വിജയകരമായ കരിയറും ബിസിനസും മുന്നോട്ട് കൊണ്ടുപോകുന്നതിനൊപ്പം മാതൃത്വത്തിന്റെ വലിയ ഉത്തരവാദിത്തങ്ങൾ എങ്ങനെ സന്തുലിതമായി കൊണ്ടുപോകാമെന്ന് ചടങ്ങിലെത്തിയ പ്രമുഖ വനിതകൾ തങ്ങളുടെ ജീവിതാനുഭവങ്ങളിലൂടെ പങ്കുവെച്ചു.
​'സ്കൈഡ്രോപ്സ് സസ്റ്റൈനബിൾ വാട്ടർ ടെക്നോളജീസ്' സ്ഥാപകയും സി.ഇ.ഒയുമായ റാന കുർദി, 'അർബൻ പോയിന്റ്' സഹസ്ഥാപക സുസന്ന ഇൻഗ്ലിസ് എന്നിവർ പങ്കെടുത്ത ആദ്യ സെഷൻ ശ്രദ്ധേയമായി. റെനാറ്റ ഗാബെ മോഡറേറ്ററായ ചർച്ചയിൽ, ബിസിനസ്സ് വിജയങ്ങൾക്ക് പിന്നിലും ഉത്തരവാദിത്തമുള്ളൊരു അമ്മയുണ്ടെന്ന സന്ദേശം അവർ അടിവരയിട്ടു പറഞ്ഞു.
​ഇൻഫ്ലുവൻസറും ഓട്ടിസം അവബോധ പ്രവർത്തകയുമായ ജോയൽ സഖൂർ, കൾച്ചറൽ സ്ട്രാറ്റജിസ്റ്റും സംരംഭകയുമായ ഡോ. അഫ്രാ അൽ നുഐമി എന്നിവർ പങ്കെടുത്ത രണ്ടാം സെഷൻ അസ്ഖ ഹാരൂൺ നിയന്ത്രിച്ചു. പൊതുരംഗത്തെ പ്രവർത്തനങ്ങളും കുടുംബത്തോടുള്ള ഉത്തരവാദിത്തങ്ങളും ഒരേപോലെ കൊണ്ടുപോകുന്നതിനെക്കുറിച്ചും, വിജയത്തിന്റെ യഥാർത്ഥ അർത്ഥത്തെക്കുറിച്ചും അവർ സംസാരിച്ചു. പ്രൊഫഷണൽ നേട്ടങ്ങൾക്കപ്പുറം നല്ല ബന്ധങ്ങൾ വളർത്തിയെടുക്കുന്നതിലും വരുംതലമുറയ്ക്ക് മൂല്യങ്ങൾ പകർന്നുനൽകുന്നതിലും സ്ത്രീ വഹിക്കുന്ന പങ്കിനെക്കുറിച്ചാണ് ഇവർ സംസാരിച്ചതെന്ന് ദോഹ വിമൻ ഫോറം സ്ഥാപക കോൺചിത പോൺസ് പറഞ്ഞു.
​തുടർന്ന് നടന്ന സെഷനിൽ സ്റ്റൈൽ കോച്ചും മേക്കോവർ വിദഗ്ധയുമായ മറിയം അമ്മാർ, മാതൃത്വത്തിന്റെ ഓരോ ഘട്ടത്തിലും സ്ത്രീകൾ സ്വന്തം വ്യക്തിത്വവും ആത്മവിശ്വാസവും എങ്ങനെ കാത്തുസൂക്ഷിക്കണമെന്ന് വിശദീകരിച്ചു. സദസ്യരെ പങ്കെടിപ്പിച്ചുകൊണ്ടുള്ള പ്രത്യേക ആക്റ്റിവിറ്റിയും ഇതിന്റെ ഭാഗമായി നടന്നു.
​യുവഗായിക യുണികാ ഡി വേര ആലപിച്ച മനോഹരമായ ഗാനത്തോടെയാണ് ചടങ്ങുകൾ സമാപിച്ചത്. ചടങ്ങിൽ പങ്കെടുത്ത അമ്മമാർക്ക് റോസാപ്പൂക്കളും സമ്മാനങ്ങളും വിതരണം ചെയ്തത് വേദിയിൽ വൈകാരികമായ നിമിഷങ്ങൾക്ക് കാരണമായി. ഔദ്യോഗിക ചടങ്ങുകൾക്ക് ശേഷം ലഘുഭക്ഷണത്തോടെയും പരസ്പര സൗഹൃദം പങ്കുവെക്കലോടെയുമാണ് സംഗമം അവസാനിച്ചത്.